Հրանտ Բագրատյանը սպորտի մասին

'Ես անկախ Հայաստանին նվիրեցի առաջին ու առայժմ միակ օլիմպիական ոսկե մեդալը: Հիմա Օլիմպիական չեմպիոնին մեկ միլիոն դոլար են խոստանում: Ես այդ փաստով ուրախանում եմ: Ինձ նույնիսկ իմ հասանելիք 100 դոլարը չտվեցին, երբ դարձա աշխարհի եւ Եվրոպայի կրկնակի չեմպիոն', երեկ իր հարցազրույցում նման հայտարարություն է արել 1996թ. Ատլատայի Օլիմպիական խաղերում Հայաստանի առաջին եւ առայժմ միակ ոսկե մեդալակիր Արմեն Նազարյանը:

ՀՀ նախկին վարչապետ, ԱԺ ՀԱԿ խմբակցության պատգամավոր Հրանտ Բագրատյանը, անդրադառնալով այդ հայտարարությանը, Ֆեյսբուք սոցիալական կայքի իր էջում գրել է. 'Արմեն Նազարյանը հրաշալի մարզիկ է։ Ցավոք սրտի նա անկախության մեր տարիների շրջանի միակ օլիմպիական չեմպիոնն է (Ատալանտա, 1996)։ Ի դեպ այն ժամանակ ընդհանուր թիմային պաշտոնական հաշվարկում Հայաստանը գրավեց 45-րդ տեղը՝ առաջ անցնելով Ադրբեջանից (61-րդ տեղ) և Վրաստանից (65-րդ տեղ)։ Սիդնեյում մենք ցավոք 64-րդն էինք, իսկ Պեկինում՝ 78-րդը։ Աթենքում ընչհանրապես 0 ենք եղել։ Վերջին 3 դեպքերում մենք միշտ զիջել ենք Վրաստանին ու Ադրբեջանին։ Սա ցույց է տալիս, որ օլիգարխներին սպորտային կառույցներն ու ֆեդերացիաները նվիրելը ոչ մի լավ բանի չեն բերում։ Ավելի ճիշտ է այդ կառույցների դեմոկրատացումը, օլիգարխների ազդեցությունից հանելը։ Ուզում են նրանք սպորտին օգնել, թող վարվեն Մանթաշովի պես, այլ ոչ թե օգնության դիմաց սպորտի ադմինիստրատիվ լծակները վերցնեն ձեռքները։ Այս պարագայում, անգամ եթե նրանց մտադրությունն ազնիվ է, ընտրության սահմանափակման հետևանքով արդյունքները ցածր են լինում։ Հիմա Արմենի մասով։ Անձամբ ես նրան 1996-ին տվել եմ կառավարության որոշմամբ 10 հազար դոլար։ Այն ժամանակ դա շատ մեծ փող էր։ Կարելի էր Երևանում լավ բնակարան գնել։ Արմենն այդուհանդերձ լքել է Հայաստանը։ Չգիտեմ երբ, բայց քանի դեռ վարչապետ էի ուշադիր եմ եղել նրա նկատմամբ։ Ճիշտն ասած նա ինձ չի դիմել։ Գուցե նա պրոբլեմներ է ունեցել հետո։ Չգիտեմ'։