ԵՐԵՎԱՆ, 14 ՕԳՈՍՏՈՍԻ, «ՓԱՍՏԻՆՖՈ»: ԱՄՆ Տեխաս նահանգում անցյալ օգոստոսի 7-ին մահապատժի են ենթարկել մտավոր հետամնաց մարդու: Ինչպես հաղորդում է «Associated Press» գործակալությունը, մահապատիժն ի կատար է ածվել այն բանից հետո, երբ ԱՄՆ Գերագույն դատարանը մերժել է դատավճիռը չեղյալ հայտարարելու վերջին խնդրագիրը:
54-ամյա Մարվին Ուիլսոնը մահապատժի է ենթարկվել մահացու ներարկման միջոցով:
Նա դատապարտվել էր 1992թ., տեղեկություններ հաղորդող ոստիկան Ջերրի Ուիլյամսին սպանելու համար: Այդ ժամանակ Ուիլսոնը ձերբակալվել էր կոկաին պահելու համար, իսկ գրավի դիմաց ազատվելուց հետո, իր ձերբակալության համար մեղադրել էր Ուիլյամսին և իր հանցակից ընկերների հետ հարձակվել նրա վրա: Տեղեկություններ հաղորդողին նրանք ծանր ծեծելուց հետո գնդակահարել էին:
Ուիլսոնը ձերբակալվեց ոստիկանի դիակը հայտնաբերելու հաջորդ օրը:
Նշվում է, որ նա նախկինում երկու անգամ դատվել է գողության համար, իսկ սպանության պահին պայմանական-վաղաժամկետ է արձակված եղել:2004 թ. հոգեբուժական թեսթը ցույց էր տվել, որ Ուիլսոնի IQ –ն կազմում է 61, որը նորմայից ցածր էր 9 նիշով: Դրա հիման վրա էլ դատապարտյալի փաստաբանները ձգտում էին հասնել մահապատիժը չեղյալ հայտարարելուն:
