Սվետլանա Գալստյանը պատրաստ է հայ օլիգարխների հետ յոգայի դասեր անցկացնել

«Համայն կանայք ամբողջական գիտելիքի» ՀԿ նախագահ, Մահարիշի վեդայական կենտրոնի կրթական հիմնադրամի ղեկավար Սվետլանա Գալստյանը պատրաստ է հայ օլիգարխների հետ յոգայի դասեր անցկացնել՝ ծանոթացնելու նրանց տրանսցենդենտալ մեդիտացիայի գաղտնիքներին: Դա, ըստ նրա, օգնում է ավելի հավասարակշռված լինել, երկրում պահպանել կայունությունը: «Եթե իրենք ցանկանան, ես պատրաստ եմ իրենց մեդիտացիա սովորեցնել»,- այսօրվա ասուլիսում ասաց բանախոսը:

Սվետլանա Գալստյանի խոսքով, Հարսնաքար ռեստորանում գրանցված ծեծկռտուքի պատճառն այն է, որ հայ հասարակության կրթական մակարդակը բավարար չէ: Ըստ նրա՝ եթե երկու մարդ փողոցում միմյանց ծեծում են, դա նշանակում է, որ նրանք ճիշտ կրություն չեն ստացել: Երկրի մթնոլորտը, Սվետլանա Գալստյանի խոսքով, շիկացած է: Իսկ այս իրավիճակից դուրս գալ կօգնի հենց մեդիտացիան:

Ինչ վերաբերում է պայքարի ակցիաներին, ապա «Այն, ինչ այսօր տեղի է ունենում, պահի ազդեցության տակ է տեղի ունենում: Եթե միևնույն ժամանակ միևնույն վայրում կատարեն մեդիտացիա մի խումբ մարդիկ, սա ստեղծում է ներքին ներդաշնակություն: Եթե երկիրը ունի ներքուստ ներդաշնակություն, պահպանում է իր մշակութային ամբողջականությունը, նման երկիր չեն կարող թափանցել վտանգավոր արտաքին ազդեցություններ»,- ասաց նա:

Ստեղծված իրավիճակի համար մեղավոր է նաև հայ կինը: Ըստ բանախոսի՝ կինն է պատասխանատու, եթե երեխան լավ չի սովորում, բռնություն է գործադրում և այլ սխալ արարքներ է թույլ տալիս:

Մասնագետը նաև նկատում է, որ հայ ժողովուրդն այսօր սթրեսի մեջ է: Սթրեսն է ստիպում, որ մարդ լիակատար ներդաշնակ չլինի և ծեծի դիմացինին:

Այն, որ հասարակության մեջ արդեն պայքարի ոգի է նկատվում, և մարդիկ չեն հանդուժում այլևս նման երևույթները, մասնագետը նման կերպ է մեկնաբանում. «Մարդիկ երևի ցականում են մաքրվել: Ինքնամաքրման գործընթաց է գնում»: