Գաղտնազերծվել են Ստալինի որդու մահվան մասին փաստաթղթերը

Իոսիֆ Ստալինի ավագ որդին` Յակով Ջուղաշվիլին սպանվել է 1943 թվականին, քանի որ հրաժարվել է ենթարկվել Զակսենհաուզեն համակենտրոնացման ճամբարի ժամապահին: Ինչպես հայտնում է «Ռիա Նովոստին», այս մասին ասվում է գաղտնազերծված փաստաթղթերում:

«Գերմանացիների զինվորական գերի ավագ լեյտենանտ Յակոբ Իոսիֆի Ջուղաշվիլիի հարցաքննության արձանագրությունից հետևում է, որ նա 1941 թվականի հուլիսի 16-ին գերի է ընկել Լյասնոյ շրջանում ` լինելով 14-րդ զրահատանկային դիվիզիայի 14-րդ հաուբիցային գնդի մարտկոցի հրմանատար»,- լրագրողներին պատմել է ՌԴ Զինված ուժերի գլխավոր շտաբի զինվորական ակադեմիայի ռազմական պատմության ինստիտուտի գիտաշխատող Միխայիլ Զուևը:

Նրա խոսքով, փաստաթղթերում ասվում է, որ 1942 թվականի ապրիլից մինչև հունիս Ջուղաշվիլիին պահել են Հոմելսբուր քաղաքի մոտ գտնվող ճամբարում: Համաձայն ԽՍՀՄ ՆԳ նախարարի տեղակալ Իվան Սերովի 1946 թվականի սեպտեմբերի զեկուցագիր-երկտողի` հետաքննությունը ցույց է տվել, որ 1943 թվականի մարտին Ջուղաշվիլին «ընդունվել է» Զակսենհաուզեն համակենտրոնացման ճամբարի հատուկ «Ա» ճամբարը:  Այստեղ նա իրեն պահել է շատ ազատ և փակ` իր ատելությունն արտահայտելով վարչակազմի նկատմամբ:

1943 թվականի վերջին Ջուղաշվիլին զբոսանքի էր դուրս եկել: Ժամապահը պահանջել է, որ նա հետ վարադառնա, սակայն դրա փոխարեն Ստալինի որդին մոտեցել է մետաղալար ցանկապատին: «Ժամապահի կշտամբանքից հետո Յակովը սկսել է հայհոյել, պատռել զինվորական բլուզը և բղավել է «Կրակի'ր»: Ժամապահը կրակել է նրա գլխին և սպանել Ջուղաշվիլիին»,-եզրափակել է Զուևը:

Մինչ  այժմ գոյություն ունի Յակոբ Ջուղաշվիլիի մահվան երկու տարբերակ: Տարբերակներից մեկի համաձայն, նա մահացել է գերության մեջ, իսկ ըստ երկրորդ տարբերակի` կռվի ժամանակ: