Գագիկ Ծառուկյանի գոտկատեղի զենքը բավական հետաքրքրական մեկնաբանությունների տեղիք տվեց նրա հարազատ կուսակցության անդամների շրջանում: Օրինակ, Ծառուկյանի մամուլի խոսնակ Խաչիկ Գալստյանի աչքին զենքը հեռախոս էր երեւացել, իսկ ահա ԲՀԿ նոր անդամ Վարդան Օսկանյանին զենքը զենք էր թվացել: Ըստ Գագիկ Ծառուկյանի, ճիշտ պատասխանը հեռախոսն է:
Հետաքրքիր կլինի տեղեկանալ իհարկե ոչ ԲՀԿ-ականների՝ քարոզարշավի մասնակից այլ ուժերի արձագանքները Ծառուկյանի գոտու տակ տեղակայված զենքի մասին:
ՀՀԿ փոխնախագահ Գալուստ Սահակյանը հայտարարել է, որ առարկայի ինչ լինելը կախված է նրա գործառույթից, իսկ գործառույթը հարաբերական հասկացություն է: “Ծառուկյանի գոտու տակ ինչ որ բան տեսա, բայց ես չեմ ցանկանում ինչ որ բան տեսնել դրա տակ եւ հեռուն գնացող գործառույթների մասին դատողություն անելու գործառույթ վերցնեմ ինձ վրա”, ասել է Գալուստ Սահակյանը:
ՀՅԴ Բյուրոյի ներկայացուցիչ Հրանտ Մարգարյանն ասել է, որ Դաշնակցությունն ուրիշի զենքերի վրա աչք չունի եւ ոչ ոք չի կարող Դաշնակցությանը զենքով զարմացնել: “Մենք այնքան զենք ունենք, ինքներս կարող ենք զարմացնել ցանկացածին: Մեզ համար պարզապես զարմանալի է, որ զենքի նման ազնվագույն երեւույթը, որ կարող է ազնիվ մետաղի արժեք ունենալ, ոչ թե շրջանառության մեջ է դրվում, այլ քնեցվում է գոտկի տակ: Զենքը փող չէ, բայց քնելով փող չի էլ դառնա: Դաշնակցությունը ափսոսում է, որ մեզանում կան զենքի փոխարժեքը չգիտակցող մարդիկ”, ասում է Հրանտ Մարգարյանը:
“Ով չի հավատում, որ Ծառուկյանի գոտու տակ զենք էր, այլ հավատում է, որ հեռախոս էր, նա մայիսի 6-ից հետո կլսի զենքի, ոչ թե հեռախոսի ձայն: Ով հավատում է, որ Ծառուկյանի գոտու տակ զենք էր, եւ ոչ թե հեռախոս, նա մայիսի 6-ից հետո ոչ մի ձայն չի լսի, որովհետեւ մայիսի 6-ից հետո լսվելու է միայն մեր ձայնը, եւ խուլերը լսելու են, բայց չեն տեսնելու, կույրերը տեսնելու են, բայց չեն լսելու, իսկ կաղերը ոչ տեսնելու են, եւ ոչ լսելու, այլ քայլելու են մեզ հետ՝ սիրով եւ շոշափելով”, հայտարարել է Ժառանգություն կուսակցության առաջնորդ Րաֆֆի Հովհաննիսյանը:
Հայ ազգային կոնգրեսի միակ թիրախը ՀՀԿ-ն է, հայտարարել է Հայ ազգային կոնգրեսը իր հայտարարությամբ: “Մենք ասել ենք, եւ կրկնում ենք, որ մեր ուշադրությունը բեւեռված է միայն ու միայն ՀՀԿ-ի եւ նրա ներքին օրգանների, օրինակ կույրաղիքի, փայծախի, ենթաստամոքսային գեղձի, լեղածորանի եւ 12 մատնյա աղիքի վրա: Այլ բան, եթե Գագիկ Ծառուկյանը զենքը ոչ թե գոտկի տակ դներ, այլ դներ գրպանը: Հայ ազգային կոնգրեսն անշուշտ դա կնկատեր եւ հանդես կգար հստակ գնահատականով, որովհետեւ մենք աչալրջորեն հետեւում եւ գնահատում ենք միայն Ծառուկյանի գրպանի պարունակությունը”, ասված է Կոնգրեսի հայտարարության մեջ:
Բռնության մշակույթը Հայաստանում
ՆԱՍԱ-ն 8 թեկնածու է ընտրել Մարս թռիչքի համար
Մարմնավաճառները խուսափում են դատարանից
Այս ամռան նշանակալից փառատոնները
Ֆիզիկոսները գտել են լիթիումային մարտկոցներ տպելու տեխնոլոգիան
Orange-ը ողջունում է Հայաստանի հեռահաղորդակցության ոլորտում նոր փոփոխությունները
45-ամյա կինը պնդում է, որ Բելգիայի թագավորի դուստրն է. գործը հասել է դատարան
Սպանդի վկաները
