Օսլոյում այսօր շարունակվել է 77 մարդու սպանած Անդերս Բրեյվիկի խաչաձեւ հարցաքննությունը: Դատախազերը հիմնական շեշտը դրել են ազգայնականների հետ նրա կապերի վրա՝ փորձելով ապացուցել, որ ուլտրաաջ եվրոպական ցանցը, որի մասին պատմել է մեղադրյալը, պարզապես նրա երեւակայության արդյունք է: Այս մասին տեղեկացնում է BBC-ն:
Բրեյվիկը շարունակում է պնդել, որ ինքը ուլտրաաջ հակաիսլամական ցանցի՝ «Տամպլիերների օրդենի» անդամ է: Նա միայն մի քանի անէական մանրամասներ է պատմել այսպես կոչված միաբանության մասին, ինչից հետո խնդրել է դատախազին չծիծաղել իր վրա:
Բերյվիկի խոսքով, տամպլիերները հանդիպում են անցկացրել Լոնդոնում, որպեսզի մշակեն իրենց քաղաքական հայեցակարգը: Սակայն ահաբեկիչը հրաժարվել է պատասխանել հարցին, թե արդյոք հանդիպմանը բռնի պայքար ծավալելու որոշում է ընդունվել:
