Թրաֆիքինգ՝ մի շարք այլ մեղադրանքների համակցությամբ

ԵՐԵՎԱՆ, 3 ՕԳՈՍՏՈՍԻ, «ՓԱՍՏԻՆՖՈ»: Երևանի Կենտրոն և Նորք-Մարաշ վարչական շրջանների դատարանում՝ դատավոր Արշակ Վարդանյանի նախագահությամբ քննվում է թրաֆիքինգի, Երևանում, Արմավիրի և Գեղարքունիքի մարզերում խաբեության, գողության և բացահայտ հափշտակության հատկանիշներով գործը:

Ըստ մեղադրանքի, Արտեմ Գասպարյանը 2010թ. մայիսից մինչև 2012թ. փետրվարի 21-ն ընկած ժամանակահատվածում Երևան քաղաքում, Արմավիրի և Գեղարքունիքի մարզերում խաբեության, գողության և բացահայտ հափշտակելու եղանակներով, ինչպես նաև՝ շորթմամբ, մի շարք քաղաքացիներից հափշտակել է նրանց պատկանող խոշոր և զգալի չափերի գույքը, (գույքի և մատուցած ծառայության դիմաց խաբեությամբ նրանց վճարել է գունավոր բազմացնող տպիչ սարքի միջոցով տպագրված, վճարման միջոց չհանդիսացող, «բիլետ բանկա պրիկոլով» գրառմամբ, ՌԴ 1.000 և 5.000 ռուբլի հուշանվեր թղթադրամներով: Դրանով նրանց պատճառվել է զգալի չափերի գույքային վնաս։

2010թ. հոկտեմբերին խաբեությամբ ամուսնանալու պատրվակով ծանոթացել է Ազնիվ Ղարագյոզյանի հետ: Ամբաստանյալը՝ հոգեբանական, ինչպես նաև ֆիզիկական հարկադրանք կիրառելու եղանակով՝ կյանքի և առողջության համար վտանգավոր բռնություն գործադրելով և այդպիսիք գործադրելու սպառնալիքներով նրան հասցրել է անգամ ինքնասպանության փորձի: Ապա մինչև 2011թ. մարտ ամիսը Ազնիվ Ղարագյոզյանին պահել է ստրկության վիճակում և, օգտագործելով իրենից կախյալ վիճակում գտնվելու առումով վերջինիս մոտ ստեղծված վիճակի խոցելիությունը, նրան ենթարկել է սեռական շահագործման, նրա կամքին հակառակ պարտադրել է կատարել իր ապօրինի պահանջներն ու ցուցումները։

Օգոստոսի 3-ի դատական նիստին ամբաստանյալը չէր ներկայացվել, փոխարենը ներկայացել էր հանրային պաշտպան Ալիկ Ստեփանյանը: Օգոստոսի 31-ի դատական նիստում դատարանը կճշտի ամբաստանյալի դիրքորոշումը գործում որպես պաշտպան Ա. Ստեփանյանին ներգրավելու վերաբերյալ: