ԵՐԵՎԱՆ, 27 ՀՈւԼԻՍԻ, «ՓԱՍՏԻՆՖՈ»: Երևանի Կենտրոն և Նորք-Մարաշ վարչական շրջանների դատարանում՝ դատավոր Մնացական Մարտիրոսյանի նախագահությամբ, հուլիսի 27-ին ավարտվեց մարդկանց շահագործելու հատկանիշներով՝ երիկամների առուծախի ձևով, գործով դատաքննությունը:
Ըստ մեղադրանքի, Սերգեյ Հովսեփյանը նախնական համաձայնություն է ձեռք բերել արտերկրում բնակվող, գործով դեռևս ինքնությունը չպարզված ոմն Ալեքսի, Ալբերտի և Բագդանի հետ, մարդկանց շահագործելու, այն է՝ օրգաններ՝ երիկամ, վերցնելու նպատակով մարդկանց հավաքագրելու, նրանց տեղափոխումը կազմակերպելու և յուրաքանչյուր անձի դիմաց երկուհազարական ԱՄՆ դոլար գումար վարձատրություն ստանալու վերաբերյալ: Ապա՝ ՀՀ-ում բժշկական կենտրոններ այցելելու և ինտերնետային կայքերում հայտարարություններ տեղադրելու միջոցով, մարդկանց վիճակի խոցելիությունն օգտագործելով, բժշկական հետազոտության և տեղափոխման ծախսերը հոգալու և երիկամի դիմաց տասհազարական ԱՄՆ դոլար գումար վարձատրություն տալու խոստումներով, հավաքագրել է Արևհատ Մխիթարյանին, Նարեկ Հովհաննիսյանին, Աշոտ Գազիլյանին, Սարգիս Ֆեսչյանին, Գայանե Ստեփանյանին և Արտաշես Մխիթարյանին ու ՀՀ պետական սահմանը հատելու միջոցով կազմակերպել է Արևհատ Մխիթարյանի, Աշոտ Գազիլյանի, Սարգիս Ֆեսչյանի և Գայանե Ստեփանյանի տեղափոխումը Շրի Լանկայի Հանրապետություն:
Իր դատաքննական ցուցմունքում ամբաստանյալ Սերգեյ Հովսեփյանը հայտնեց, որ երիկամի դոնոր դառնալու իր ցանկության մասին ինքը հայտարարություն է գրել ռուսական ինտերնետային կայքում, ապա իր հետ կապվել էին և սակարկելուց հետո 12 հազար դոլար գումարի դիմաց վաճառել է երիկամը՝ վիրահատությունը կատարվել է Շրի Լանկայում: Սակայն երիկամային թրաֆիքինգի ցանցի մեջ են հայտնվել նաև այլ մարդիկ, որոնք ամբաստանյալի բնորոշմամբ, «հասուն մարդիկ են, որոշել են վաճառել իրենց երիկամը, ես էլ օգնել եմ»: Այն հարցին, թե եթե այդ գործունեությունը օրինական էր, ինչո՞ւ էր ամբաստանյալը դոնորներին ասում, որ իր բարեկամին է պետք երիկամի փոխպատվաստումը, Ս. Հովսեփյանը հայտարարեց, թե չէր ուզում, որ նրանք իմանային, որ ինքն էլ է վիրահատվել:
Հարկ է նշել, որ Ս. Հովսեփյանի «ծառայություններից » օգտվել են ծայրահեղ կարիքի մեջ հայտնված անձինք: Մասնավորապես, գործով տուժող Աշոտ Գազիլյանը իր խնդիրները լուծելու համար այլ ելք չէր տեսել, քան զոհաբերել սեփական օրգանը՝ երիկամը: Առաջին անգամ մեկնել էր Շրի Լանկա 2011թ. դեկտեմբերին, սակայն փոշմանել էր, վերադարձել, ապա ամիսներ անց նորից էր մեկնել և այս անգամ վիրահատվել էր՝ 10 հազար դոլար վարձատրության դիմաց:
Սա հաստատեց նաև տուժողի ազգական, վկա Գևորգ Մարիանյանը, ինչպես նաև տուժողի կինը՝ Հերմինե Խաչատրյանը՝ իր նախաքննական ցուցմունքում. վկան վատառողջ լինելու պատճառով չէր ներկայացել դատարան:
Դատարանում ավարտվեց գործի գրավոր ապացույցների՝ դատաբժշկական փորձաքննության եզրակացությունների, հեռախոսային զանգերի վերծանումների, գաղտնալսումների արձանագրություններ, հավաքագրված դոնոր տուժողների բժշկական փաստաթղթեր, բանկային փոխանցումներ և այլն, հետազոտումը: Հուլիսի 31-ի դատական նիստում դատարանում կսկսվի դատական վիճաբանությունների փուլը՝ մեղադրողի մեղադրական ճառով:
Լյուքս Ստեփանյանի հարազատները պայքարելու են մինչև վերջ
ՊԵԿ-ը անցել է «հարձակման»
Էթիկայի հանձնաժողովը քննարկել է Գագիկ Խաչատրյանի հարցը
ՊԵԿ-ը ստուգումներ է կատարում՝ չներկայացնելով հիմնավորված որոշումը
Զինվորական հանցագործությունների «բացահայտման» որջը
Խոշտանգե՞լ են ձերբակալված զինվորին
Նախկին պատգամավորի շենքը անցել է բանկին, բնակիչները զրկվել են տներից
Օդի բաղադրությունը դատարաններում
