«Հարսնաքարի» կախարդական շրջանը

Քանի որ այս օրերին մամուլի առաջին հորիզանականում կրկին տեղ են գտել Ռուբեն Հայրապետյանի անունն ու թիկնապահների բռնությունը, փորձեք ինտերնետում որոնում տալ, և ձեր առջև կբացվի բռնությունների այն «լայնածավալ» դաշտը, որն ընդգրկում է տարբեր տարիներ ու ժամանակներ: Եթե անգամ վերցնենք այս վարքագիծը մեկ տասնամյակի կտրվածքով, ապա սա արդեն կենսագրություն է և դաժան կենսագրություն:

Սրանք բոլորն էլ հաղորդումներ են հանցագործության մասին, սակայն հայտնի է, որ այս անձը վայելում է բարձր իշխանության հովանավորությունը, և պատժի մասին խոսելն ավելորդ է: Այդուհանդերձ, Ռուբեն Հայրապետյանին մեկ անգամ «պատժել են», երբ նա իր թիկնազորի հետ միասին ծեծի էր ենթարկել Վարդան Այվազյանին: Այս պատմությունից հետո Ռուբեն Հայրապետյանը հայտնվեց Էրեբունի ժամանակավոր պահման մեկուսարանում և 3 կամ 4 օր անցկացրեց այնտեղ: Նրան պահում էին կեղտոտ խցում, և նա հրաժարվել էր սնվելուց: Պատժողը երկրորդ նախագահ Ռոբերտ Քոչարյանն էր, ով այսպիսով փորձել էր նվաստացնել Հայրապետյանին, քանի որ վերջինս համարձակվել էր ծեծի ենթարկել իր մտերիմ անձանցից մեկին` Վարդան Այվազյանին: Վերջինս այս դեպքերից քիչ ուշ զբաղեցրեց բնապահպանության նախարարի պաշտոնը:

Այս պատմությունից հետո Ռուբեն Հայրապետյանի գլխին նոր ամպեր կուտակվեցին 2004-ին, երբ իրավապահ մարմինները Ավանի բնակիչ Ռոբերտ Խաչատրյանի անհայտացման փաստով վերջինիս դիակը փնտրում էին «Հարսնաքար» հյուրանոցային համալիրում: Քննության ընթացքում ոստիկանությունը հարցաքննել էր հյուրանոցի ավելի քան մեկ տասնյակ աշխատակիցների, բռնությունների ու նվաստացումների ենթարկել նրանց, այդ թվում նաև կանանց: Ոստիկանությունն այսպիսով փորձում էր դիակի հայտնաբերման հետ կապված տեղեկություններ ստանալ խոստովանական ցուցմունքների միջոցով, սակայն այս գործը հետագայում լուրջ ընթացք չունեցավ:

Համացանցում արձանագրված այս դեպքերից մեծ մասի համար, որպես «դեպքի վայր», հանդիսացել է «Հարսնաքարը»: Սրանք, իհարկե, այն դեպքերն են, որոնք հայտնի են դարձել մամուլին: Մասնավորաբար, Ռուբեն Հայրապետյանի անունն ու դրան զուգորդող բռնությունները առավել շատ հիշատակվում է ընտրական պրոցեսներում: «Ա1+» էլեկտրոնային կայքն արձանագրել է 2008-ի նախագահական ընտրությունների օրը տեղի ունեցած բավական հայտնի մի միջադեպի մասին, որն առանձնանում է իր դաժանությամբ.

«Լեւոն Տեր-Պետրոսյանի 2 վստահված անձանց`Արսեն Խանամիրյանին եւ Գարիկ Ղազարյանին մեքենայով տարել են «Հարսնաքար» հյուրանոցային համալիր։ Վստահված անձանց «Հարսնաքար»-ում դիմավորել է Ռուբեն Հայրապետյանը 20-30 մարդկանց հետ, ովքեր դաժան ծեծի են ենթարկել նախագահի թեկնածուի վստահված անձանց”։ Վերջիններս հայտնաբերվել էին երկար որոնումներից հետո, ապա տեղափոխել հիվանդանոց: Վստահված անձանցից Արսեն Խանամիրյանը ենթարկվել էր դաժան խոշտանգումների և նա տևական ժամանակ անցկացրեց հիվանդանոցում: Ծեծին անձամբ մասնակցել է Ռուբեն Հայրապետյանը»:

Այժմ հանրությունն ապրում է Ռուբեն Հայրապետյանի անվան հետ կապված հերթական շոկը, ծեծի ենթարկված 35-ամյա Վահե Ավետյանը գտնվում է ծայրահեղ ծանր վիճակում: Նրա ուղեղում առաջացել է հեմատոմա, որի արդյունքում գլխուղեղի մի կիսագունդը որոշ չափով տեղափոխվել է մյուս կիսագնդի մեջ:

«Կյանքին բավականին լուրջ վտանգ է սպառնում: Ուղղակի չեմ կարողանում խոսքեր գտնել. մարդիկ կարող են իրար չհասկանալ, կարող են վեճի բռնվել, բայց այս աստիճանի ծանր հարվածներ, ես չեմ պատկերացնում...»,- Ազատություն ռադիոկայանին ասել է Վահե Ավետյանի առողջական վիճակին հետևող բժիշկը: