Ապամոնտաժողների դատավճիռը. Տեսանյութ

  • Իրավունք - Ուրբաթ, 08 Հունիսի 2012, 19:45

Այսօր վարչական դատարում կայացվել է ՌԱՀՀԿ նախագահ, ապամոնտաժման առաջին բրիգադի անդամ Մանվել Սարգսյանի, ապամոնտաժման բրիգադի անդամներ Կարեն Շիկոնյանի և Կարո Եղնուկյանի գործով դատավճիռը` ապամոնտաժման ժամանակ ոստիկաններին չենթարկվելու և արգելափակոցները շրջանցելու մեղադրանքով:

Դատավոր Աղասի Դարբինյանի նախագահությամբ վճռվեց ՀՀ ոստիկանության հայցը բավարարել և Մանվել Սարգսյանին և Կարեն Շիկոնյանին ՀՀ վարչական իրավախախտումների վերաբերյալ ՀՀ օրենսգրքի 182-րդ հոդվածով ենթարկել վարչական պատասխանատվության՝ 50.000 ՀՀ դրամի չափով:

Կարո Եղնուկյանի գործով դատավճիռը, դատավոր Արծրուն Միրզոյանի նախագահությամբ նույնպես վճռվեց հօգուտ ՀՀ ոստիկանության հայցի:

Հայցվոր կողմի ներկայացուցիչ, ՀՀ ոստիկանության ներկայացուցիչ Էդգար Պետրոսյանը այդպես էլ չներկայացավ:

Մինչ վճռի ընթերցումը, ինչպես նաև վճռի ընթերցումից հետո վարչական դատարանում իսկական իրարանցում էր: Մաշտոցի պուրակի ակտիվստները եկել էի բողոքի ձայն բարձրացնելու: Դատավոր Աղասի Դարբինյանը հապճեպ ընթերցեց վճիռը՝ արհամարհելով հանրության պահանջը՝ ավելի մեծ դահլիճ տեղափոխելու, քանի որ դահլիճը նման էր խցի, որտեղ մի քանի հոգուց ավելի հնարավոր չէր տեղավորել:

Դատավճռից հետո Մանվել Սարգսյանը ասաց, որ վճիռը չի զարմացրել, այն սպասելի էր իրենց համար, և արդեն դատարանում երևում էր, որ ցանկություն չկա արդար դատաքննություն վարելու, քանի որ չտրվեց ժամանակ բերել փաստեր, ըստ որի՝ ոստիկանները պնդում էին, որ բրիգադի անդամների գործողություններում չկան օրինախախտումներ:

Մանվել Սարգսյանի խոսքով՝ ի սկզբանե ոստիկաններին ասվել էր, որ եթե իրենց գործողություններում կան օրինախախտումներ, թող ձերբակալեն, ինչին ոստիկանները չեն գնացել:

«Մենք պետք է մտածենք՝ ինչ անել, որովհետև կարծում եմ, որ նման կերպ Հայաստանում դատարանները որևէ լավ բանի չեն հասնի: Խնդիրը 50.000-ը չէ, այլ ընդհանրապես մենք ուզում էինք, որ դատ լինի և ցույց տանք երկրի իրական վիճակը», ասաց Մանվել Սարգսյանը:

Վճիռը բողոքարկելու շուրջ դեռ չեն մտածել, բայց ըստ ամենայնի կարհամարհեն և լրջորեն կմտածեն նման դատական համակարգից Հայաստանը ազատելու մասին:

Կարեն Շիկոնյանն էլ չէր ակնկալում այլ կերպ կընթանա դատական գործընթացը, քանի որ առաջին նիստից պարզ եղավ, որ դատական համակարգը անկախ չէ: Նա նշեց, որ դատական համակարգը տվյալ դեպքում կատարեց քաղաքական պահանջ: «Այն, ինչ կատարվում էր, որևէ հույս չէր ներշնչում, որ արդար կընթանա, բայց որ մեր ժողովրդի մեջ աստիճանաբար բարձրանում է քաղաքացիական գիտակցությունը, սա ամենակարևոն է», ասաց Կ. Շիկոնյանը:

ՄԻԺԻ նախագահ Արփինե Գալֆայանն էլ նկատեց, որ «դա իրականում բացասական որոշում էր, որը ցույց տվեց, թե ինչ խղճալի վիճակում է մեր ՀՀ արդարադատությունը, որը ապացուցեց որ անգամ վարչական գործով ինքնուրույն որոշում չի կարող կայացնել դատավորը, և սա հենց իրենց՝ դատավորների համար է ցավալի»:

Վերջում ակտիվիստները մի գլխարկով սկսեցին փող հավաքել և դիմեցին դատարանի ոստիկաններին գումար տալու առաջարկով: Առաջարկը նրանց կողմից մերժվեց: Նրանցից որևէ մեկը շռայլ չգտնվեց, ավելին՝ ոստիկանները անակնկալի էին գալիս նմանօրինակ ակցիայից և դուրս հրավիրում, թեև ակտիվստները բացում էին դատարանի բոլոր դռները և հանկարծակիի բերում բոլորին: