ԿԸՀ-ն արձագանքել է մեր հրապարակմանը

lragir.am ԷԼԵԿՏՐՈՆԱՅԻՆ ԼՐԱՏՎԱՄԻՋՈՑԻ 12.05.2012 Թ. «ՏԻԳՐԱՆ ՄՈՒԿՈՒՉՅԱՆԻ ԿԱԴՐԵՐԸ ՀՐԱՊԱՐԱԿՄԱՆ ԿԱՊԱԿՑՈՒԹՅԱՄԲ

Հոդվածի հեղինակը, անդրադառնալով մայիսի 10-ին թիվ 17 ընտրատարածքային ընտրական հանձնաժողովի կողմից մեծամասնական ընտրակարգով պատգամավորի թեկնածու Գագիկ Ներսիսյանի վստահված անձանց ներկայացրած դիմումի քննարկմանը, մասնավորապես գրում է. «Հովիկ Աբրահամյանի հովանավորյալ և ԿԸՀ նախագահ Տիգրան Մուկուչյանի հավանությանն արժանացած ընտրատարածքային հանձնաժողովի նախագահ Արմեն Մարգարյանի համար բողոքների քննարկումը ընդամենը զվարճանքի պես մի բան էր:… Ընտրատարածքային հանձնաժողովի նախագահը նշանակվում է ԿԸՀ նախագահի կողմից, տվյալ դեպքում Տիգրան Մուկուչյանի»:

ՀՀ կենտրոնական ընտրական հանձնաժողովը տեղեկացնում է, որ համաձայն ՀՀ ընտրական օրենսգրքի 41-րդ հոդվածի 1-ին մասի` «…Ընտրատարածքային ընտրական հանձնաժողովի անդամներին նշանակում է կենտրոնական ընտրական հանձնաժողովը մինչև ընտրատարածքային ընտրական հանձնաժողովի լիազորությունների ավարտը», իսկ նույն հոդվածի 12-րդ կետը սահմանում է. «Ընտրատարածքային ընտրական հանձնաժողովների նախագահներին, հանձնաժողովների նախագահների տեղակալներին և հանձնաժողովների քարտուղարներին ընտրում են համապատասխան հանձնաժողովներն իրենց կազմերից` կենտրոնական ընտրական հանձնաժողովի նախագահի, նախագահի տեղակալի և քարտուղարի ընտրության համար սահմանված կարգով»:

ՀՀ կենտրոնական ընտրական հանձնաժողովի 2011թ. օգոստոսի 15-ի N 64-Ա որոշմամբ` Արմեն Էմիկի Մարգարյանը նշանակվել է թիվ 17 ընտրատարածքային ընտրական հանձնաժողովի անդամ, և վերջինս հանձնաժողովի նախագահ է ընտրվել համապատասխան հանձնաժողովի կողմից:

Վերոգրյալից ակնհայտ է, որ թիվ 17 ընտրատարածքային ընտրական հանձնաժողովի նախագահ Արմեն Մարգարյանը չէր կարող «նշանակված» լինել Տիգրան Մուկուչյանի կողմից, քանի որ 2011թ. օգոստոսին Տիգրան Մուկուչյանը զբաղեցրել է ՀՀ վարչական վերաքննիչ դատարանի նախագահի պաշտոնը: