«Էս մեկին էլ սենց են սպանում»

Երբ Մատաղիսի գործով դատաքննության ժամանակ հացադուլի մեջ գտնվող մեղադրյալ Ռազմիկ Սարգսյանը դատարանի դահլիճում ուշագնաց եղավ, և փաստաբանը միջնորդեց շտապ օգնություն կանչել, զինվորական դատախազության ներկայացուցիչը` տիկին մեղադրող Անահիտ Եղիազարյանը մերժեց փաստաբանի կողմից արված բուժօգնություն ցույց տալու միջնորդությունը և դատարանից պահանջեց շարունակել հարցաքննությունը:

Չի բացառվում, որ նման մի տեսարանի ականատեսը դառնանք նաև վաղը Կապանի դատարանում, որտեղ սկսվում է ապրիլի 5-ից հացադուլ հայտարարած զինծառայող Սուրեն Կիրակոսյանի գործով դատական առաջին նիստը: Թե ինչպես է 26 օր հացադուլի մեջ գտնվող զինծառայողը դատարան ներկայանալու` հայտնի է միայն զինվորական դատախազությանը, որը հաստատել է մեղադրանքը և դատարանում պաշտպանելու է այն:

Փետրվարի 22-ից կալանքի տակ գտնվող զիյնվորը մեղադրվում է Քր.օրի 361 հոդվածի 4-րդ մասով (զորամասը լքելը): Երբ դատարանը որոշում էր նրան կալանքի տակ վերցնելու հարցը, զինծառայողը հայտարարել է, որ ինքը զինծառայությունից չի հրաժարվում, խնդրում է իրեն բժշկական հետազոտության ենթարկել և բուժել. «Ես ի վիճակի չեմ այս առողջությամբ ծառայել», հայտարարել է Սուրենը: 

Սուրեն Կիրակոսյանը զորամասը լքելու լուրջ պատճառներ է ունեցել: Նրան բանակ են զորակոչել արդեն հիվանդ վիճակում, իսկ զորամասում հիվանդությունը խորացել ու բարդացել է ընդհուպ մինչև վիրաբուժական միջամտության անհրաժեշտությունը, սակայն վիրաբույժը զգուշացրել է զինվորին, որ վիրահատության դեպքում նրա կյանքը հիսուն-հիսուն է և մեկ ամսից միայն պարզ կլինի` ուռուցքը չարորակ է, թե բարորակ:

Եվ ահա հոգեբանական այս վիճակում զինծառայողի մոտ հայտնաբերվել են նաև այլ հիվանդություններ, և նա չի վերադարձել զորամաս, որտեղ շուրջ մեկ տարվա ծառայության ընթացքում որևէ բուժում չի ստացել:

Գորիսի ՔԿՀ-ում հացադուլի մեջ գտնվող զինվորի առողջական վիճակի մասին միակ տեղեկությունը մայրը ստացել է ապրիլի 18-ին` պատգամավոր Զարուհի Փոստանջյանի Գորիսի բանտ այցելելուց հետո, ում վկայությամբ, զինծառայողի վիճակը մխիթարական չէր: Հացադուլ հայտարարած զինվորի առողջական վիճակի մասին տեղեկություն ստանալը անհնար է ոչ թե այն պատճառով, որ զինվորական իրավապահները զլանում են հայտնել, այլ այն պատճառով, որ չգիտեն:

Սովորական անտարբերություն շարքային զինծառայողի և նրա առողջության նկատմամբ: Միայն այս տարի նման անտարբերության արդյունքում մի քանի մահվան դեպքեր են գրանցվել:

Հսկող դատախազ Տիգրան Սարգսյանն օրինակ մեզ հետ զրույցի ընթացքում ասաց, որ իրեն հայտնի չեն զինծառայողի հիվանդությունները հաստատող փաստեր, բայց, երբ ասացինք, որ մեր ձեռքի տակ այդ հիվանդությունները հաստատող փաստաթղթեր կան, ասաց, որ ինքը էմոցիաներով չի առաջնորդվում, քանի որ այդ դեպքում մեր երկիրը տանուլ կտա, և զինվորը, պարտադիր, քրեական պատասխանատվության պետք է ենթարկվի:

Դատական նիստի նշանակման մասին մենք տեղեկացանք պատահաբար և պարզեցինք, որ այդ մասին ծանուցում չեն ստացել անգամ Սուրեն Կիրակոսյանի հարազատները: Որդու առողջական վիճակի մասին տեղեկատվության իսպառ բացակայության պատճառով մայրը` Զվարթ Կիրակոսյանը հայտնվել է անօգնական վիճակում:

Մայրը ընդունելություն է խնդրել պաշտպանության նախարար Սեյրան Օհանյանից, սակայն վերջինս մերժել է նրան ընդունել: Նախընտրական խառը օրեր են, զինվորների մահվան դեպքերը շարունակվում են, և սա չէ այս օրերի էական հարցը: Զինվորները, կյանքից զրկվելով, ՊՆ-ի համար վիճակագրություն են դառնում և մեկ զինվորի մահով ավել, թե պակաս` ոչինչ չի փոխվում:

“Էս մեկին էլ սենց են սպանում”, ասում են խաղաղ պայմաններում զոհված զինծառայողների հարազատները:

Այսօր զինվորի մորը կանչել են զինվորական դատախազություն, հավանաբար բացատրելու, որ տանուլ տված երկրի համար պատասխանատուն հենց նրա որդին է:

Լուսանկարում` Սուրեն Կիրակոսյանի մայրը