Գորիս քրեակատարողական հիմնարկում ապրիլի 5-ից հացադուլ է հայտարարել Հրազդանի զինկոմիսարիատից բանակ զորակոչված շարքային զինծառայող Սուրեն Կիրակոսյանը: Զինծառայողը, ում դեռևս 2009 թ. բանակ են զորակոչել առողջական լուրջ խնդիրներով, որոնք խորացել են զինծառայության ընթացքում, պահանջում է ազատել իրեն կալանքից և նշանակել համալիր բժշկական հետազոտություն:
Արդեն 13-րդ օրը հացադուլի մեջ գտնվող զինծառայողի պահանջը դեռևս չի կատարվել: Զինծառայողը նաև ցանկություն է հայտնել հանդիպել պաշտպանության նախարար Սեյրան Օհանյանի հետ, սակայն նրան չեն ընդառաջել:
Զինծառայողի հիվանդությունը հայտնի է եղել դեռևս զորակոչի ընթացքում և առկա է Կենտրոնական ռազմաբժշկական հանձնաժողովի նախագահ Ս. Չալյանի եզրակացությունը` “զորակոչել բուժումից հետո”, սակայն նրան զորակոչել են առանց համապատասխան բուժման: Զինծառայության առաջին օրերից հիվանդությունն իրեն զգացնել է տվել, սակայն նրա բողոքները բուժում ստանալու հետ կապված զորամասում անհետևանք են մնացել:
Զինծառայողը բանակ է զորակոչվել “Ձախ ուսագոտու և կրծքավանդակի առաջնային մակերեսի ձախ կեսի պիգմենտային ի ծնե խալեր” ախտորոշմամբ և գրանցվել որպես պիտանի է ոչ շարային ծառայությանը, սակայն զինգրքույկում, իբր, սխալմամբ գրված է եղել պիտանի է շարային ծառայությանը և զորամասում լիարժեք ծառայություն է անցկացրել, ինչը նպաստել է հիվանդության բարդացմանը: Զինվորական հագուստն ու զենքը նպաստել և վնասել են զինծառայողի ուսի վրա առկա խալի մեծացմանը ու սիմետրիկության խախտմանը, նաև մազ է աճել, ինչը խիստ վտանգավոր է կյանքի համար:
«Ես նախարար Սեյրան Օհանյանին խնդրեցի, որ որդուս տեղափոխեն հոսպիտալ և բուժեն, սակայն հոսպիտալում այդպես էլ հետազոտություն չարվեց և որդիս բուժում չստացավ : Տղայիս տեղափոխել են ուռուցքաբանական կենտրոն, որտեղ վիրահատության առաջարկ են արել, սակայն վիրահատող բժիշկը ասել է, որ քո կյանքը հիսուն հիսուն է և մեկ ամսից միայն պարզ կլինի այս ուռուցքը չարորակ է, թե բարորակ», փոխանցում է Սուրեն Կիրակոսյանի մայրը` Զվարթ Կիրակոսյանը:
Հասկանալով վերահաս վտանգը՝ զինծառայողը հրաժարվել է վիրահատությունից:
Նրան կրկին ներկայացրել են Կենտրոնական ռազմաբժշկական հանձնաժողոեվի նիստին, այս անգամ ախտորոշման մեջ ավելացնելով աննշան բառը.«Ձախ ուսի և կրծքավանդակի շրջանում պիգմենտային խալեր`զինվորական համազգեստը և զենքը կրելուն աննշան խանգարող», որի համաձայն նա պետք է շարունակի զինծառայությունը, սակայն սահմանափակումով:
Մայրն ասում է, որ Սուրենը հասկանալով, որ իր կյանքը ռեալ վտանգի տակ է, հոգեբանական ծանր ապրումներ է ունեցել և մեկ ամսվա ընթացքում նիհարել է 35 կգ-ով` 95 կգ-ից դառնալով 60 կգ: Մայրը խնդրել է տղային արձակուրդ հատկացնել, և Էրեբունի հիվանդանոցում հետազոտություն անցկացնելուց հետո պարզվել է, որ տղան նաև այլ հիվանդություններով է տառապում:
“Ստամոքսում 3 հատ էռոզիա ունի, երիկամներում քար, աղիներում ասկարիդներ և երեխաս բուժում չի ստանում»,- պատմում է մայրը: Զինծառայողը արձակուրդից հետո այլևս չի վերադառնում զորամաս:
Նա հինգ ամիս շարունակ գտնվել է տանը և միայն 2012 թ. մայիսի 22-ին են նրան կալանավորել և քրեական գործ հարուցել Քր.օրի 361-ի 4-րդ մասով (զորամասը լքելը):
Դատարանում զինծառայողը հայտարարել է, որ ինքը զինծառայությունից չի հրաժարվում, խնդրում է իրեն բժշկական հետազոտության ենթարկել և բուժել. «Ես ի վիճակի չեմ այս առողջությամբ ծառայել”, հայտարարել է շարքային զինծառայողը:
Փաստորեն, բանակի ղեկավարությունը բուժելու փոխարեն գերադասել է հիվանդ և հոգեբանական ծանր վիճակում գտնվող զինվորին տեղափոխել բանտ: Այսպիսին են այն բարեփոխումները, ինչի մասին առավոտից երեկո հայտարարում են բանակի պատասխանատուները և սա այն դեպքում, երբ հիվանդ զինծառայողներին անուշադրության մատնելու արդյունքում միայն այս տարի մի քանի մահվան դեպքեր են արձանագրվել:
Հ.Գ. Գործի քննությունը վարող քննիչ Արթուր Սարգսյանը մեր հարցին ի պատասխան ասաց. «Ես ձեզ ոչինչ չեմ կարող ասել, ցտեսություն»:
Լուսանկարում Սուրեն Կիրակոսյանի մայրն է, hra.am
Վ. Շահինյան. Լիազորությունները չարաշահող պաշտոնատար անձինք կհայտնվեն ՀՔԾ տեսադաշտում
Քրեական գործ Սամվել Ալեքսանյանի կամ Տարոն Մարգարյանի դեմ
Ինքնասպանություն երեք կրակոցով
Բարձր աշխատավարձը օրենքը հարգելու երաշխիք չէ
