Չարժե ռեսուրս ներդնել ՏԻՄ ընտրությանը

Հարցազրույց Ժառանգություն կուսակցության փոխնախագահ Արմեն Մարտիրոսյանի հետ

- ՏԻՄ առաջիկա ընտրություններին ընդդիմությունը կարծես թե որոշակի պասիվություն է ցուցաբերում: Ձեր կարծիքով, որն է պատճառը, որ ընդդիմադիր կուսակցությունները լայն մասնակցություն չեն ցուցաբերում ընտրություններին, հատկապես համայնքապետերի թեկնածուներ առաջադրելու առումով:

- Պասիվության կամ ակտիվության հարց գոյություն չունի, որովհետեւ տեղական կառույցներն իրենք են որոշում: Իրենք են ընտրություններին մասնակցողները, իրենք էլ որոշում են՝ ինչ աստիճանի մասնակցություն ցուցաբերել: Բայց մեր կուսակցությունն առաջադրել է ավագանու թեկնածուներ, նույնիսկ Թալինում կայացած ընտրություններին մեր թեկնածուն ընտրվել է: Հնարավոր է՝ գյուղապետերի թեկնածուներ էլ ունենանք: Այնպես որ, մեծ պասիվություն չկա. ՏԻՄ ընտրություններին մասնակցում ենք այնքանով, որքանով տարածքային կառույցները նպատակահարմար են համարում:

- Տպավորություն է, որ հիմնական պայքարն ընթանալու է ՀՀԿ-ի ու ԲՀԿ-ի միջեւ, քանի որ իրենք են հիմնականում թեկնածուներ առաջադրել:

- Ես կարծում եմ՝ պայքարն ընթանալու է թեկնածուների միջեւ: Այնքան էլ ճիշտ չեմ համարում ՀՀԿ եւ ԲՀԿ միջեւ սահմանագիծ անցկացնելը, որովհետեւ Գյումրիում, օրինակ, քաղաքապետի թեկնածու առաջադրել է ԲՀԿ-ն, եւ այդ թեկնածուին սատարում է ՀՀԿ-ն: Այնպես որ, օրինակ Հայաստանի 2-րդ քաղաքում այդ պայքարը չկա, ըստ էության՝ միասնական թեկնածու է:

- Բայց հենց ՀՀԿ եւ ԲՀԿ թեկնածուներն են ամենաշատն առաջադրվել համայնքապետի պաշտոնում:

- Որովհետեւ այդ ընտրակեղծիքների մեխանիզմը, որ միշտ աշխատել է, իրենց ձեռքում է: Նույն ՀՀԿ-ն, օրինակ Թալինում, մյուս ՀՀԿ-ականին էր մեղադրում ընտրակեղծիքների մեջ, կամ՝ ԲՀԿ-ն ՀՀԿ-ին էր մեղադրում: Այս ամենը ցույց է տալիս, որ նույն ընտրակեղծիքների մեխանիզմն այստեղ է գործադրվում, եւ իմաստային առումով մեծ ռեսուրսներ, ֆինանսական մեծ ծախսերն այս պայքարում արդյունավետ չեն: Սա ԱԺ ընտրությունների նման չէ, որ որոշակի տոկոս հավաքելու դեպքում կլինես ԱԺ-ում: Սա նաեւ նախագահական ընտրությունների նման չէ, որ քաղաքական խոշոր պրոցեսներ խթանի երկրում: Որքան տոկոս ուզում ես՝ հավաքիր, եթե մրցակից թեկնածուն 1 ձայն անգամ ավելի հավաքի, ինքն է համարվում հաղթողը: Այնպես որ, հաշվի առնելով այս ամենը, չեմ կարծում, որ արժե մեծ ռեսուրսներ ներդնել ՏԻՄ ընտրություններում:

- Տեսակետ կա, որ նախագահական ընտրություններից առաջ արժեր, որպեսզի մարզերում, համայնքներում քաղաքական ուժերն իրենց «տեղը պնդացնեին»:

- Դա որեւէ բան չի փոխի: Նախագահական ընտրություններն ընթանում են բոլորովին այլ տրամաբանությամբ, հետեւաբար՝ այնտեղ որեւէ պատճառահետեւանքային կապ գտնելը ճիշտ չէ:

- Ի դեպ, ինչպես կմեկնաբանեք ձեր գործընկեր կուսակցությունում՝ Ազատ դեմոկրատներում տեղի ունեցողը. Այդ կուսակցությունից մարդիկ հեռացան, պաշտոնական պատճառաբանությունն էլ այն էր, որ համաձայն չէին Ժառանգության հետ այս ձեւաչափով համագործակցությանը, միասնական ցուցակ կազմելուն:

- Ես չեմ կարծում, որ հենց Ժառանգության հետ համագործակցության պատճառով են դուրս եկել ԱԴԿ-ից, որովհետեւ՝ Ժառանգությունում էլ կան մարդիկ, որոնք դեմ էին համատեղ միասնական այդ ցուցակին: Բայց դա ոչ առիթ, ոչ էլ պատճառ չհանդիսացավ, որ դուրս գան կուսակցությունից:

ԱՐՄԱՆ ԳԱԼՈՅԱՆ