Իրանում նավթի արդյունահանման ծավալները 2012թ հունիսին ռեկորդային անկում են արձանագրել՝ հասնելով 20 տարվա նվազագույնին, գրում է The Financial Times-ը: Հանդեսի տվյալներով, հունիսին Իրանում արդյունահանման միջին օրական մակարդակն իջել է մինչեւ 3.2 մլն բարել, ինչը նվազագույնն է սկսած 1992թ: 2011թ երկիրն օրական 3.7 մլն բարել նավթ էր արդյունահանում:
Հուլիս ամսվա ընթացքում, փորձագետների կարծիքով, արդյունահանման ծավալները կարող են ընկնել օրական մինչեւ 1.3 միլիոն բարել: Նրանք այդպիսի կանխատեսում են արել` հենվելով Իրան ուղեւորվող նավթային տանկերների տվյալների վրա:
Իրանում նավթի արդյունահանման եւ արտահանման ծավալները նվազում են միջազգային պատժամիջոցների պատճառով, որոնք մտցրել են ԱՄՆ-ը եւ Եվրամիությունը: ԵՄ-ը հուլիսի 1-ին ամբողջությամբ դադարեցրել է իրանական նավթի ներմուծումը:
