Լեռնային Ղարաբաղի հակամարտության լուծման համար հակամարտող կողմերը պետք է առաջին հերթին հույսն իրենց վրա դնեն: Այսօր Երևանի պետական համալսարանում ուսանողների և պրոֆեսորադասախոսական կազմի հետ հանդիպմանը նման խորհուրդ տվեց Հարավային Կովկասում Եվրամիության հատուկ ներկայացուցիչ Ֆիլիպ Լեֆորտը:
Նրա խոսքով` հարցի լուծման հիմնական պատասխանատվությունը կրել են և կրում են կողմերը: Իսկ ԵՄ-ն կարող է ընդամենն առաջարկել իր օժանդակությունը, բայց հրաշքներ գործել չի կարող:
«Մենք չենք ուզում, որ պատերազմ լինի, դա կործանարար կլինի տարածաշրջանի երեք երկրների համար: Բայց հույսներդ չափազանց շատ մի դրեք միջազգային գործընկերների վրա, մենք ամենազոր ու ամենակարող չենք: Յուրաքանչյուր միջազգային դերակատար նախ և առաջ իր շահն է հետապնդում: Խնդրի լուծումը պետք է նախ ներսից գտնվի»,- ընդգծեց դիվանագետը:
Նա նկատեց, որ ԼՂ հակամարտությունն այսօր լրջորեն սահմանափակում է Հայաստանի զարգացումը: Միաժամանակ դիվանագետը խորհուրդ տվեց չընկճվել` հիշեցնելով, որ աշխարհում չկա անլուծելի հակամարտություն:
«Շատ բարդ վիճակում, որում երկու պետություններն ապրում են, լավագույն դաշնակիցը հույսն է: Հույս, որ կլինի այլընտարքային լուծում: Մադրիդյան սկզբունքները լուրջ այլընտրանք են: ԵՄ-ն կարող է աջակցել, որպեսզի դրանք կյանքի կոչվեն»,- նշեց նա:
Պատասխանելով Ադրբեջանի կողմից շփման գծում հրադադարի ռեժիմի խախտման վերաբերյալ հարցին, ԵՄ պաշտոնյան նշեց, որ ԵԱՀԿ-ն փորձում է կանխել միջադեպերը: «Բոլոր դեպքերում կյանքի կորուստը ողբերգական է: Ողբերագական իրադարձությունների թիվն ավելանում է, որը նաև հակամարտության կրակին յուղ է լցնում: Մենք պատասխանատվություն այս հարցում չունենք, ԵԱՀԿ-ն պետք է այս մեխանիզմը գործի դնի: Պետք է կողմերն իրականում հարգեն իրենց հանձնառությունները»:
Ֆիլիպ Լեֆորտը հստակ չպատասխանեց այն հարցին, թե ԵՄ-ն ինչպես է վերաբերվում այն փաստին, որ Ադրբեջանը շարունակում է խախտել Եվրոպայում սովորական սպառազինությունների մասին պայմանագիրն ու մեծ քանակությամբ սպառազինություն կուտակել:
«Կարծում եմ, որ այս խիստ բարդ հակամարտության պայմաններում, երբ ամեն ինչ ապակայունացման ուղղությամբ է գնում, պատերազմական լեզվի օգտագործումն ու ռազմատենչ հայտարարությունները պետք է կանխել: Մենք պահանջում ենք, որ ամեն կերպ դա պահպանի: Կան մտահոգություններ երկու կողմերի սպառազինությունների ավելացման մասին, դա լավ ազդանշան չէ: Երկիրն իրավուքն ունի ապահովելու իր պաշտպանությունը, բայց մենք այսօր տեսնում ենք սպառազինության մրցավազք, ինչը մտահգության տեղիք է տալիս»,- նշեց նա:
Դիվանագետի կարծիքով` ճիշտ չէ, որ Ղարաբաղն այսօր մեկուսացված է:
«Մեկուսանալը որևէ արդյունք չի կարող տալ: Մենք պահանջում ենք, որպեսզի կողմերը որևէ նախապայման չդնեն, որոնք նախկինում դրվել են և խոչընդոտել են ԼՂ հասնելու հնարավորությունը: Մենք այնտեղ գնալու մանդատ չունենք, ԵԱՀԿ Մինսկի խմբի համանախագաներն ունեն, բայց մենք չունենք: Մենք աշխատում ենք այս ուղությամբ, այդքանը կարող եմ ասել»,- ասաց նա:
Եթե Մինսկի խմբի ձևաչափը փոխվի, ըստ Ֆիլիպ Լեֆորտի, մեծ ռիսկ կա, որ կողմերը կզրկվեն ներկայիս վիճակից և կվերադառնան զրոյական ելակետ:
Եվրոպացի դիվանագետը նաև նշեց, որ ԵՄ կարծիքով` Հարավային Կովկասի տարածաշրջանը պետք է վերակառուցել, կապել արտաքին աշխարհի և հատկապես Եվրոպական միության հետ: «Եվ այդ ժամանակ մենք առաջին դերակատարումը կունենանք այստեղ, ինչպես Բալկաններում ունեցանք»,- նշեց նա:
Պաշտպանության նախարարի մամուլի քարտուղարի արձագանքը Ադրբեջանին ռուսական զենքի մատակարարման վերաբերյալ
Ստոպ, Մոսկվա, պետք չէ ստել
Թուրքիայի ոստիկանության արցունքաբեր գազի պաշարները սպառվել են
Քենեդու հայտնի ելույթից ուղիղ 50 տարի անց Օբաման նույն վայրում կոչ կանի կրճատել միջուկային զինանոցները
Փհենյանը սպառնացել է սպանել Հիտլերի գրքի մասին լուրեր տարածողին
Սերժ Սարգսյանը «կգցի՞» Եվրոպային
