Հայաստան-Եվրամիություն ազատ առևտրի համաձայնագրի շուրջ բանակցությունների առաջին փուլը նախատեսվում է սկսել հունիսի 19-20-ը Բրյուսելում կայանալիք հանդիպման ժամանակ: Այս մասին այսօր լրագրողներին տեղեկացրեց էկոնոմիկայի փոխնախարար Գարեգին Մելքոնյանը, ով նաև հայկական կողմից Ազատ առևտրի համաձայնագրի շուրջ բանակցողն է:
«Մայիսի 3-ին Բրյուսելում մենք անցկացրեցինք բանակցությունների, այսպես կոչված, զրո ռաունդը, առաջիկայում բուն բանակցությունները կսկսենք»,- տեղեկացրեց փանխախարարը:
Իսկ մինչ այդ, Հայաստանում այսօր անցկացվում է ՀՀ-ԵՄ առևտրի, տնտեսական և համապատասխան իրավական հարցերով համագործակցության ենթակոմիտեի 11-րդ նիստը: Նիստին մասնակցելու նպատակով Հայաստան է ժամանել ԵՄ պատվիրակությունը` Առևտրի գլխավոր տնօրինության Եվրոպայի և Կենտրոնական Ասիայի բաժնի պետ Լյուկ Դեվինյեի գլխավորությամբ:
Նիստի ընթացքում քննարկվում են հարցեր, որոնք ներառվելու են նաև ազատ առևտրի համաձայնագրի փաթեթում: Քննարկումները վերաբերում են տարբեր ոլորտներում կողմերի համագործակցությանը, մրցակցային պայմանների բարելավմանը, ձեռնարկությունների հիմնմանը և այլ թեմաների:
«Համաձայնագրի ստորագրումից և իրագործումից հետո ակնկալում ենք արտաքին առևտրային գործունեության էական ակտիվացում, ինչպես նաև արտադրական հզորությունների ու կարողությունների ավելացում»,- նշեց Գարեգին Մելքոնյանը: Նրա խոսքով` այսօր էլ Եվրամիությանը Հայաստանի հիմնական առևտրային գործընկերն է: Մեր երկրից ապրանքների 47 տոկոսն արտահանվում է Եվրամիության 27 երկրներ: Սա կողմերը լրջագույն ցուցանիշ են համարում:
Լյուկ Դեվինյեն նշեց, որ ազատ առևտրի համաձայնագրի շուրջ բանակցությունները հիմնված են Եվրոպական հանձնաժողովի այն զեկույցի վրա, որում ասվում է, որ Հայաստանի իշխանությունները բավականաչափ քայլեր են կատարել բերափոխումների ուղղությամբ:
«Խոսքը առևտրի ոլորտում տեխնիկական խոչընդոտների վերացման, մրցակցային դաշտի և մտավոր սեփականության դաշտի կատարելագործման մասին է: Միաժամանակ դեռ շատ անելիքներ կան: Մենք հուսով ենք, որ նոր ձևավորվելիք կառավարությունը կշարունակի բարեփոխումները, և Հայաստանը համաձայնագրի վերջնական ստորագրմանն ամբողջությամբ պատրաստ կլինի»,- նշեց եվրոպացի մասնագետը:
Հայաստանի արտգործնախարարի հանդիպումները Ստրասբուրգում
Մահացել է Արգենտինայի նախկին դիկտատորը
Միգրանտներն այսուհետ ծառայելու են ռուսական բանակում
Տարածքների «հանձնման» հարցը հանվե՞լ է կարգավորման նախագծից
Արեւմուտքն առաջարկում է սկսել Սամվել Ալեքսանյանից
Հայաստանի դրոշը բարձրացվեց Ստրասբուրգի քաղաքապետարանի առջև
Սիրիացի փախստականների թիվը գերազանցել է 1.5 միլիոնը
