Ինչքան շուտ իշխանությունը ըմբռնի ձախողումների հետեւանքը, այնքան շուտ կազատենք հայ ժողովրդին փորձություններից: Այդ միտքը հունվարի 11-ին հայ-թուրքական արձանագրությունների դեմ հանրահավաքի ընթացքում հնչեցրել է ՀՅԴ Գերագույն Մարմնի ներկայացուցիչ Արմեն Ռուստամյանը: “Այս գործընթացի մեջ, ինչպես մենք ասում էինք, թելադրող է Թուրքիան, որովհետեւ պահել է իր բոլոր լծակները ազդելու գործընթացի վրա, Հայաստանը կորցրել է իր բոլոր հնարավորությունները ազդել այս գործընթացի վրա”, ասում է Արմեն Ռուստամյանը, նշելով, թե եթե Հայաստանի իշխանությունը սխալից հետ կանգնի, ապա ժողովուրդը դա կհամարի տղամարդկություն եւ կգնահատի:
“Եվ մեր այսօրվա ցույցի եւ հանրահավաքի բուն նպատակն էլ սա է: Մենք այս հանրահավաքով եւ ցույցով եւս մեկ անգամ մեր իշխանություններին, Սահմանադրական դատարանի անդամների ուշադրությունն ենք բեւեռելու այն հնարավորությունների վրա, որոնց վրա հենվելով Սահմանադրական դատարանն արդեն իրավական վճիռ կարող է կայացնել եւ կասեցնել այս գործընթացը”, ասում է Արմեն Ռուստամյանը: Նրա խոսքով, իրենք իշխանությանը ցույց են տալիս գործընթացից դուրս գալու ճանապարհը: Ռուստամյանը հարց է տալիս, թե եթե արձանագրությունները նախապայման չունեն, եթե դրանց առարկան Թուրքիայի սահմանը ճանաչելը չէ, ապա իշխանությունն ինչու չի գնում վերապահումների ճանապարհով եւ վերացնում մտահոգությունները:
Բայց, Արմեն Ռուստամյանը նաեւ նշում է, որ վերապահումների իրավունք Հայաստանի խորհրդարանը, որը պետք է վավերացնի արձանագրությունները, չունի: “Ամբողջ աշխարհում այդպես է. այն մարմինը, որն իրավունք ունի վավերացնելու, նա էլ իրավունք ունի վերապահումներ առաջարկելու եւ իրականացնելու: Բայց դժբախտաբար, այսօրվա օրենքներով, դա նույնպես վերապահված է նախագահին: Ուրեմն միակ ճանապարհը այստեղ մնում է Սահմանադրական դատարանն այս ձեւով կասեցնի գործընթացը, հետ ուղարկի, որ նախագահը վերապահումներ անելով նորից սկսի այդ գործընթացը ներպետական”, ասում է Արմեն Ռուստամյանը:
Նրա խոսքով, եթե Սահմանադրական դատարանը չանսա իրենց կոչին եւ արձանագրությունները ճանաչի Սահմանադրությանը համապատասխանող, մնում է մյուս փուլը. Ազգային Ժողովում հասնել նրան, որ պատգամավորները դեմ քվեարկեն խորհրդարանում: Դրա համար Դաշնակցությունը ստորագրահավաք է նախաձեռնել եւ քաղաքացիներին կոչ է անում ակտիվ մասնակցել դրան: Ըստ Արմեն Ռուստամյանի, հավաքվել է մոտ 70 հազար ստորագրություն, բայց նա դա բավարար չի համարում եւ կոչում է քաղաքացիներին ամեն մեկն իր բնակավայրում միանա այդ ստորագրություններին եւ դրանք ներկայացվեն տվյալ բնակավայրը ներկայացնող պատգամավորին: “Դժվար չէ ամեն մեկի համար այդ մի չնչին լուման բերել իր երեխաների ապագայի համար: Դա եկեք բերենք ամեն մեկս, այսօրվանից, այս պահից նոր թափ հաղորդենք այդ ստորագրահավաքին: Եվ ես ձեզ վստահեցնում եմ, սիրելի հայրենակիցներ, դա մեծ ազդեցություն է ունենում: Մեծ ազդեցություն է ունենում մեր ցույցը, մեր հանրահավաքը, որպեսզի կարողանանք սթափեցնել մեր համապատասխան մարմիններին, որ հետ կանգնեն այդ պրոցեսից”, ասում է Արմեն Ռուստամյանը: Նա հանրահավաքի մասնակիցներին մաղթել է, որ ընթացիկ տարին ավարտեն հայ-թուրքական արձանագրություններից հայ ժողովրդին ու Հայաստանը ձերբազատելով:
Պաշտպանության նախարարի մամուլի քարտուղարի արձագանքը Ադրբեջանին ռուսական զենքի մատակարարման վերաբերյալ
Ստոպ, Մոսկվա, պետք չէ ստել
Թուրքիայի ոստիկանության արցունքաբեր գազի պաշարները սպառվել են
Քենեդու հայտնի ելույթից ուղիղ 50 տարի անց Օբաման նույն վայրում կոչ կանի կրճատել միջուկային զինանոցները
Փհենյանը սպառնացել է սպանել Հիտլերի գրքի մասին լուրեր տարածողին
Սերժ Սարգսյանը «կգցի՞» Եվրոպային
