Թատերագետ, այս օրերին ընթացող «Թատրոն-X» փառատոնի նախագահ Արա Խզմալյանը Մաշտոցի պուրակ էր եկել` իր աջակցությունը հայտնելու ապամոնտաժող բրիգադին և ինքնորոշված քաղաքացիներին:
Պարոն Խզմալյան, ի՞նչ է պուրակը Ձեզ համար և արդյոք հնարավո՞ր է ապամոնտաժող բրիգադում նաև Ձեզ տեսնել հաջորդ օրերի ընթացքում:
Մաշտոցի պուրակն այսօր շատ խորհրդանշական վիճակում է, քանի որ գտնվում է ծննդատան կողքին` նոր կյանք, նոր ծնունդ, ճակատագիր, պատասխանատվություն… Իրականում երկու սիմվոլ համընկել են իրար` ֆիզիկական ծնունդը և քաղաքացիական միջավայրի ծնունդը: Սրանք հրաշալի բաներ են, ինձ համար մեծագույն ձեռքբերում, և կարծում եմ` յուրաքանչյուր ողջամիտ քաղաքական այր միայն պետք է ողջունի այս շարժումը: Ես չեմ ուզում, որ այս շարժումը վերածվի իշխանություն-ընդդիմություն շարժման, որտեղ գործում են կոնկրետ շահեր: Այսինքն` սա զտված մոդել է, չենք ասում իշխանափոխություն, չենք ասում` դեմ ենք նախագահին, մենք ասում ենք օրենքի տառի պահպանություն: Սա ամենակարևոր քայլն է, և այսօրվա մռայլության մեջ լավատեսության նոտան:
Ըստ Ձեզ` քաղաքացիական հասարակության ձևավորման, ինքնորոշվա՞ծ քաղաքացու սկիզբն է այսօր դրվում Մաշտոցի պուրակում:
«Թատրոն X»-ը մենք հիմնադրեցինք մեկ նպատակով, որ յուրաքանչյուր ոք հնարավորություն ունենա իր կարծիքն արտահայտելու այս կամ այն իրողության հանդեպ: «Թատրոն –X»-ը բանավեճի, քննարկումների հրապարակն է և կարգախոսն է` մշակութային միասնություն, բանավեճի փառատոն: Իսկ Մաշտոցի պուրակում իրականում ամենաքաղաքացիական, քաղաքակիրթ բանավեճն է իշխանական որևէ օղակի հանդեպ: Սա շատ առողջ և ճիշտ մոտեցում է: Այսօր այն, ինչ արվում է Մաշտոցի պուրակում, ուղղված է իշխանության շահերին, և իշխանությունները պետք է ի վիճակի լինեն սա հասկանան:
Մի կողմից չեն ապամոնտաժում և ընդունում են` սա հանրային տարածք է, մյուս կողմից ասում են, որ ընդամենը 3 տարի են բուտիկները մնալու:
Գաղտնիք չէ, որ կյանքը շատ ավելի բարդ է, քան մենք ենք պատկերացնում: Կոնկրետ շահերի բախումներ կան: Ես մի քանի անգամ շփվել եմ քաղաքապետ Տարոն Մարգարյանի հետ, զուտ էներգետիկ մակարդակում ինձ վրա լավ տպավորություն է թողել: Տղամարդկային ինչ-որ ազնիվ և անմիջական բան կա նրա մեջ, որ իմ համակրանքը շարժում է: Ամեն դեպքում, եթե այստեղ հավաքվածներն ասում են, որ օրենքը խախտվում է, երկրում օրենքից վեր որևէ մեկը, որևէ անձնական հարաբերություն, համակրանք չպետք է աշխատի: Այն բոլորից, ամեն ինչից վեր է:
Հնարավո՞ր է, որ հաջորդ բրիգադին էլ Դուք միանաք:
Ես չեմ պատրաստվում իմ հայրենիքը լքել: Ես երազում եմ, որ իմ երեխան ապրի այս երկրում և չունենա այն խնդիրները, որ այսօր մենք ունենք: Եվ եթե իմ ներկայությունը այստեղ նպաստելու է 0,1 տոկոսով այդ երազանքի իրականացմանը, ես պատրաստ եմ:
Նախընտրական պրոցեսներ են: Մենք գիտենք, որ մշակույթի գործիչները, արվեստագետները մեկ անգամ չէ, որ իրենց մատուցում են իշխանություններին, հանդես են գալիս ելույթներով: Ձեզ հասցրե՞լ են առաջարկել, փորձել ինչ -որ ձևով ներգրավել իրենց կողմը:
Ես ապրում եմ այս երկրում տիրոջ իրավունքով և տիրոջ հոգեբանությամբ: Յուրաքանչյուր նախարար, յուրաքանչյուր իշխանավոր ժամանակավոր երևույթ է: Ես ապրում եմ այդ մտայնությամբ, որ ինձ միշտ հարցնելու են և որ ես եմ միշտ պատասխանատու լինելու այն ամենի համար, ինչ կատարվում է: Ես հավատում եմ, որ ժամանակի ընթացքում այս մոտեցումը գերակշիռ է դառնալու: Վերևում` ադմինիստրատիվ օղակներում հայտնված յուրաքանչյուր մարդ ժամանակավոր է: Մեկը լավ կաշխատի, մյուսը`վատ, բայց տերը և պատասխանատուն մենք ենք և այս հոգեբանությամբ պետք է տեր կանգնենք մեր երկրին: Ես էլի եմ խնդրում, որ թույլ չտանք, որ որևէ մեկը սա ծառայեցնի իր քաղաքական շահերին: Մենք քաղաքական հակակրանքի և համակրանքի մասին չենք խոսում, մենք խոսում ենք օրենքի մասին, ինչը ամենակարևորն է: Եվ ես համակրում եմ այս շարժումը, և հենց շարժման մասնակիցները սա չեն փորձում վերածել քաղաքական ակցիայի, սա քաղաքացիական դիրքորոշում է, իսկ դրանք էապես տարբեր բաներ են:
Հնարավո՞ր է «Թատրոն X»-ը գա պուրակ:
Ես ձեր առաջարկը վարչությանը կներկայացնեմ, ես միահեծան ղեկավար չեմ: Սա շատ առողջ հուսադրող ակցիա է, սա իշխանափոխության պահանջ չէ, հակաիշխանական լոզունգներով հանդես չեն գալիս, շատ կոնկրետ տարածքի շուրջ ենք խոսում և օրենքի դիրքերից, ուրեմն բոլորս ենք ձեզ հետ:
Հնարավո՞ր է` սա ապամոնտաժելու դեպքում օրենքը սկսի գործել և երկրում համակարգային փոփոխություն տեղի ունենա:
Ցավոք սրտի, ոչ սովորական քաղաքացիները, ոչ էլ իշխավորները չեն պատկերացնում ակցիաների կարևորությունը, որ եթե մենք ուժ ունենք և ուժ ենք ձևավորում արտաքին մարտահրավերների դեմ պայքարելու, ինքներս մեզ շտկելու, ինքներս մեզ ճանաչելու, այսպիսի պրոցեսներն ուղղակի անհրաժեշտություն են և բխում են յուրաքանչյուր իշխանության շահերից, և ես շատ կուզենայի այստեղ վարչապետին ձեր ձեռքը սեղմելիս և շնորհակալություն հայտնելիս տեսնեի: Քաղաքացիական միջավայրն այնպիսի միջավայր է, որ այստեղ պաշտոններն էական դեր չեն խաղում: Պաշտոնյան ինքը պետք է լինի քաղաքացիական մթնոլորտի կարևորագույն մասը: Վարչապետը, նախագահը կամ մեկ այլ պաշտոնյան այստեղ հայտնվելով` մթնոլորտը կփոխեր, կիմաստավորեր այս շարժումը: Սա շատ կարևոր է, և ես ուզում եմ վերևում նստած մարդիկ սա հասկանան:
Կիպրոսն էլ կործանեց «խնամի, ծանոթ, բարեկամ»-ի սկզբունքը
Վերջին շրջանում օրակարգ են թելադրում քաղաքացիները
Բեմադրություն, որտեղ անտաղանդ են թե՛ սցենարիստը, թե՛ ռեժիսորը
Մեր երկրում այլևս ցիվիլ տարբերակով հարց լուծել հնարավոր չէ
Մենք կարծես ընկել ենք բացասական ցիկլի մեջ եւ վատից վատն ենք միայն տեղաշարժվում
Ունենք մի անիմաստ պաշտոն` նախագահի պաշտոնը
«Կասկած կա, որ յուրացվել են հարկատուների հաշվին ձևավորված միջոցները»
Սա ազգային պետություն չէ, այլ կեղեքման և ստրկացման գործիք
Կոմպրոմատային հավասարակշռությունը խախտվում է
Խնդիրը Արմավիան չէ, այլ հայկական ավիացիայի ոչնչացումը
