«Ելքն էլ ասել է, որ լեգիտիմ ընտրություններ են»

    • Հարցազրույց - 10 Հունվարի 2018, 09:25
Մեր զրուցակիցն է Ժառանգություն կուսակցության փոխնախագահ Արմեն Մարտիրոսյանը

Պարոն Մարտիրոսյան, հունվարի 19-ին «Ելք» դաշինքը երթ է իրականացնում՝ ընդդեմ թանկացումների։ Դուք միանո՞ւմ եք այդ երթին, թե ոչ։

Վաղուց եմ ասել, որ Հայաստանում որևէ մեկը միայնակ ոչինչ չի կարող անել, համատեղ ջանքեր են պետք։ Այս դեպքում սա միայն Ելքի նախաձեռնությունն է, համենայն դեպս, ես որևէ տեղեկություն չունեմ, որ իրենք ինչ-որ մեկի հետ խորհրդակցել են։ Երկրորդ՝ գոնե իմ քաղաքական կենսափորձը ինձ թույլ է տալիս ասելու, որ ամեն մի գործընթաց իր ժամանակահատվածն ունի, հակառակ դեպքում, երբ ինչ-որ մի բան ես նախաձեռնում, դա ավելի շուտ գոլորշի բաց թողնելու գործընթաց է դառնում, քան թե իրական փոփոխությունների համար գործողություն։ Եվ այս դեպքում չեմ իմանում՝ ինչպիսի արձագանք կգտնի հասարակության մոտ։ Բնականաբար, յուրաքանչյուր քաղաքական ուժի որոշելիքն է, թե ինքն ինչպիսի քայլեր է նախաձեռնում, և ես այդտեղ մասնակցություն ունենալու խնդիր ընդհանրապես չունեմ։ Իրենց նախաձեռնած քայլն է, և ճիշտ թե սխալ, իրենք են որոշում։

Մեկ անգամ չէ, որ Դուք հարցազրույցներում նշել եք, որ այս իրավիճակը երկար շարունակվել չի կարող, որ ֆորս-մաժորներն անխուսափելի են։

Սա ֆորս-մաժոր չէ։ Բացի այդ, ոչ ֆորս-մաժորի պարագայում միայն ընդդիմադիր դաշտի հետ համաձայնեցված քայլը կարող է դրական արդյունք տալ։ Եթե վերմակ քաշելու կամ այլ գործընթաց են փորձում իրականացնել քաղաքական ուժերը, դա էլ իրենց որոշելիքն է, ամբողջովին իրենց լիազորությունների շրջանակում է։ Եվ այս պարագայում ես չեմ տեսել, որ ինչ-որ մի երթով հնարավոր է ինչ-որ բան փոխել։ Եվ եթե փոփոխություն կլինի դրա արդյունքում, ես միայն կողջունեմ։

Ինչո՞ւ ընդդիմադիր հատվածը չի միավորվում։ Սա մի՞թե հարմար առիթ չէ։

Բայց ով է մեզ ինչ-որ բանով դիմել, որ մենք էլ մերժել ենք կամ չենք քննարկել։

Իրենք դիմում են քաղաքացիներին։

Շատ ուրախ եմ, որ մեր երկու միլիոն կամ ավելի նվազ կամ ավելի շատ քաղաքացիներ կմասնակցեն այս միջոցառմանը։ Համենայն դեպս, դուք այս հարցը ինձ տալիս եք ոչ որպես ՀՀ քաղաքացի, այլ որպես Ժառանգություն կուսակցության փոխնախագահ։ Եվ ես  ասում եմ, որ որևէ մեկի հետ ոչ խորհրդակցություն եմ անցկացրել, ոչ հրավեր եմ ստացել, և ոչ էլ մերժել եմ։ Իսկ իմ կարծիքը փոփոխությունների վերաբերյալ մեկ անգամ չէ, որ ասել եմ՝ Հայաստանում որևէ քաղաքական ուժ միայնակ չի կարող իրավիճակ փոխել, և դրա համար պետք է իրական ընդդիմադիր հատվածի մասնական ջանքերը և ճիշտ ժամանակին։

Հիմա, կարծում եք, ճիշտ ժամանակը չէ՞։

Կարծում եմ՝ ոչ, իրենք կարծել են, որ ճիշտ ժամանակն է, դրա համար էլ իրենց  հաջողություն եմ մաղթում։

Ինչո՞ւ եք կարծում, որ հիմա ճիշտ ժամանակը չէ, որովհետև ընտրական գործընթացներ չկա՞ն։

Չէ, ընտրական գործընթացների հետ կապ չունի։ Իմ սուբյեկտիվ կարծիքով հասարակական տրամադրությունները հունվարի 19-ին դեռևս այդ աստիճանի պատրաստ չեն լինի իշխանափոխության և արմատական բարեփոխումների գործընթացի համար։

Իշխանությունն ասում է, որ բունտի նախադրյալները չկան, որ բունտը ոչ մի լավ տեղ չի տանում։

Իշխանությունն ինչ ուզի, կասի, իշխանության խնդիրը չէ։ Մեզ մոտ ի՞նչ է, իշխանությունը օրինական քվեով ձևավորվա՞ծ է, հասարակության հետ կապ ունի՞, քաղաքացիների, պետության շահերի հետ կապ ունի՞, որ ես էլ ասեմ իրենց մտածելը կամ արտահայտվելը ճիշտ է, թե սխալ։ Իրենք այդպես էլ պետք է ասեն, որ որևէ բունտ պետք չէ, ամեն ինչ օրինական է եղել, ընտիր ընտրություններ են եղել, որևէ մեկը ընտրություններից հետո դուրս չի եկել փողոց, թե ինչի պիտի դուրս գային անիմաստ տեղը, Ելքն էլ ասել է, որ լեգիտիմ ընտրություններ են, տեղամասերում ամեն ինչ հրաշալի էր։ Ինչ է եղել, իշխանությունը պետք է ասի, առավել ևս, որ այդ ընտրությունները լեգիտիմացնող ընդդիմություն է եղել իրենց հետ։ Եվ կարծես քաղաքացիները լավ չեն հասկանում այդ ամենը։ Իրենց թվում է, որ անընդհատ կեղծիք է, երկիրը մենաշնորհված է, կոռուպցիայի և անարդարության մեջ թաղված է, արտագաղթում են, չեն հասկանում էլի՝ որքան դրական իրավիճակ է երկրում, ինչ լեգիտիմ ընտրություններ են, ինչ արդար կառավարման համակարգ է։

Ապրիլից առաջ կլինե՞ն կատակլիզմներ։

Հայաստանում 1995-ից սկսած ամեն օր կատակլիզմներ հնարավոր են։ Այդ հեղափոխության նախադրյալները կան Հայաստանում։

Դուք չեք մասնակցելու այդ երթին, թեև դեմ եք այդ թանկացումներին։

Չեմ մասնակցելու։ Որևէ բանական մարդ թանկացումներից գոհ լինել չի կարող։

Ամենաընթերցվածը