Իմ տեսակետը հայտնի է, բոլորն ամեն ինչ հասկանում են. Ծառուկյան դաշինքը կքննարկի հարցը

    • Հարցազրույց - 12 Սեպտեմբերի 2017, 11:55
Մեր զրուցակիցն է ՀՀՇ վարչության նախագահ, ԱԺ Ծառուկյան խմբակցության պատգամավոր Արարատ Զուրաբյանը

Պարոն Զուրաբյան, Ելքը ԱԺ հայտարարության նախագիծ է ներկայացրել, ըստ որի՝ ՀՀ-ն պետք է որդեգրի ԵԱՏՄ-ից հեռանալու քաղաքական ուղեգիծ և Եվրասիական տնտեսական միության պայմանագրի գործողությունն իր մասով դադարեցնելու գործընթաց սկսի։ Ի՞նչ եք մտածում այս նախաձեռնության վերաբերյալ։

Մտածում եմ, երբ Ելքը ներկայացնի, մենք պայմանավորվել ենք, որ խմբակցությունում քննարկում կիրականացնենք, որտեղ կհնչեն բոլոր տեսակետները, և ըստ դրա՝ կորոշենք, թե ինչպես է Ծառուկյան դաշինքը դրան անդրադառնալու կամ ինչ լուծումներ է տեսնելու։

Հաշվի առնելով Ձեր գաղափարները Հայաստանի տեսլականի վերաբերյալ՝ արդյոք հենց սկզբից չե՞ք խրախուսում այս նախաձեռնությունը։

Մի բան է անհատ Արարատ Զուրաբյանը, մեկ այլ բան է խմբակցության անդամ Զուրաբյանը։ Բնականաբար, այս երկու ռեժիմները պետք է ինչ-որ ձևով հաշվի առնելով առաջնորդվենք։ Ակնհայտ է, որ երբ այդ քննարկումները տեղի ունենան, ես իմ տեսակետները կներկայացնեմ, իսկ իմ տեսակետները հայտնի են։

Նկատի ունեք, որ Հայաստանը չե՞ք տեսնում ԵՏՄ-ի ընտանիքում։

Ընդհանրապես, ես Հայաստանը տեսնում եմ եվրոպական ընտանիքում, եվրասիական ընտանիքի հետ էլ կոնկրետ հարաբերություններ տեսնում եմ, որ կարող են բնականոն լինել։ Իհարկե, հիմա աշխարհում հակադրման պրոցեսները շատ ծավալուն են և այստեղ շատ բարդ է գտնել բանալին, որ ի վերջո, տնտեսական տարբեր ռեժիմներում գործող կառույցների հետ կարողանաս միաժամանակ հարաբերվել։ Ապագան, կարծում եմ, ցանկացած մարդ գիտակցում է, թե որն է։ Ես իմ տեսակետները կներկայացնեմ քննարկման ժամանակ, իսկ թե ինչ կորոշենք, ցույց կտան այդ քննարկումները։

Երբ ԱԺ-ում ԵՏՄ մտնելու փաստաթուղթն էր քննարկվում, այն ժամանակ ԲՀԿ-ն դեմ չգնաց այդ փաստաթղթին։

Այստեղ դեմ գնալ կամ չգնալու հարցը չէ։ Մի բան ակնհայտ է, որ Հայաստանը պետք է ունենա առանձին հարթակներ իր տնտեսական գործունեությունը ծավալելիս որոշակի գործընկերային հարաբերություններ ունենալու համար։ Երբ խոսվում էր Ասոցացման պայմանագրի մասին, ինչ-որ տեղ գործում էր կամ-կամ սկզբունքը, իսկ հայկական կողմը պնդում էր և-և-ը։ Հիմա եկեք նայենք ուշադիր, թե ինչ է տեղի ունեցել, քանի որ չպետք է կորցնենք պրագմատիզմը, որը որոշակիորեն խոսում է այն մասին, որ այն պետությունները, որոնք գնացին եվրասոցացման, բավական լուրջ խնդիրներ ունեցան իրենց կյանքում։ Չմոռանանք Ուկրաինայի տարբերակը, մյուս երկրների օրինակները, և պետք է հաշվի առնենք, որ ունենք արցախյան հակամարտություն։ Այդ ամենը հաշվի առնելով՝ պետք է քննարկենք, թե ինչպիսի զարգացումներ ու լուծումներ ենք տեսնում և ինչ ենք ակնկալում։ Սա շատ ծանրակշիռ հարց է, և մատների արանքով նայելով, զուտ ցույց տալու համար, որ դու ունես քաղաքական այս կամ այն դիրքորոշումը և դրանից ելնելով պետք է արտահայտես այն, մի փոքր ճիշտ չէ։ Հարցն իսկապես լուրջ է։

Այդ նախաձեռնության մեջ մի կետ էլ անվտանգության հետ է կապված։ Մասնավորապես, նշվում է, որ ԵՏՄ մտնելուց հետո մենք առաջին անգամ տարածքային կորուստներ ենք ունեցել։ Սա հիմնավոր դրույթ չէ՞։

Եկեք մի բան հասկանանք. ՀՀ-ն պետություն է, որը, ցավոք սրտի, շրջապատված է այնպիսի հարևաններով, որոնցից մի մասը, առնվազն 50 տոկոսը, որևէ հարևանական հարաբերություններ ծավալելու հակում կամ ցանկություն չունի, և այդ իրողությունը մենք պետք է միշտ նկատի ունենանք։ Երբ մենք խոսում ենք արտաքին քաղաքական այս կամ այն հարցի վերաբերյալ, մենք պետք է չմոռանանք, որ մեր ցանկացած քայլ պետք է լինի շատ պատասխանատու։ Ես կուզեմ, որ յուրաքանչյուր անհատ, ով մասնակցում է նմանատիպ քննարկմանը, ոչ թե փորձի զբաղվել պոպուլիզմով կամ փորձի ինչ-որ տեղ ներկայացնի, որ ինքը մտահոգ է, շատ լավ հասկանում է. բոլորը ամեն ինչ շատ լավ հասկանում են։ Կրկնում եմ՝ սա ծանրակշիռ հարց է և այստեղ լուծում գտնելը շատ բարդ է։ Կարծում եմ՝ մենք պետք է աշխատենք, որպեսզի իրոք ինտեգրվենք եվրոպական ընտանիքին, իսկ դրա համար շատուշատ բաներ են պետք։ Եկեք արձանագրենք, որ եթե ՀՀ-ն ինչ-որ մի օր կարողանա արձանագրել հաջողություններ, ստեղծի ապրանքատեսակներ, որոնք եվրոպական շուկայում մրցունակ կլինեն, որևէ մեկը չի խոչընդոտի, որ դրանք հայտնվեն Եվրոպայում կամ աշխարհի որևէ այլ մայրցամաքում։ Մենք չպետք է մոռանանք այն իրողությունները, որոնց ներքո ապրում ենք։ Էլի եմ ասում, հարցը քննարկվելու է, քննարկման ընթացքում, բնականաբար, ես իմ տեսակետները կարտահայտեմ, քանի որ իմ տեսակետները կրողների թիվը չգիտեմ ինչքան է, կփորձեմ պաշտպանել այս տեսակետը, ինչ որ տեղ նաև եղանակներ և  ճանապարհներ առաջարկել։ Իսկ թե ինչպիսի զարգացում կլինի, կյանքը ցույց կտա։

Ի՞նչ եք կարծում, ԵՄ-ի հետ նոր համաձայնագիրը կյանքի կկոչվի՞ նոյեմբերին, ինչպես պնդում են իշխանությունները, թե մեկ գիշերում հնարավոր է էլի իրավիճակ փոխվի։

Համաձայնագիրն արդեն կյանքի է կոչված։ Եթե հիշում եք, ասոցացման համաձայնագրի նախաստորագրման ժամանակ էր, երբ այն ընդհատում ունեցավ, և Հայաստանը գնաց այս ճանապարհով։ Սա արդեն նախաստորագրված է, և կարծում եմ որևէ խոչընդոտ չի լինի։ Իհարկե փաստաթղթին ծանոթ չենք, երբ կլինի այն, նոր մեր մոտեցումները կներկայացնենք, բայց չեմ կարծում առանձնապես լուրջ խոչընդոտ լինի։ Իհարկե, այսօր աշխարհը գտնվում է ծայրահեղ լարված վիճակում, գոնե աշխարհքաղաքական այն խաղացողների դեպքում, որոնք այս կամ այն ձևով առնչվում են մեզ հետ, որևէ բան բացառել հնարավոր չէ։ Բայց ուզում եմ լավատես լինել և հույս հայտնել, որ որևէ բան չի խոչընդոտի։

Պարոն Զուրաբյան, Ծառուկյան խմբակցության ղեկավար Գագիկ Ծառուկյանը չի բացառում հնարավոր կոալիցիա իշխանության հետ։ Այդպիսի իրավիճակում ի՞նչ դիրքորոշում կունենաք։

Չեմ ուզում եթեներով շարունակել ապրել։ Ցանկացած իրավիճակ ծնում է որոշակի քայլեր։ Կապրենք, կգա այն փուլը, երբ կլինեն զարգացումներ, այդ զարգացումները կթելադրեն նաև քայլեր։ Չեմ ուզում առաջ ընկնել որևէ բանից և չեղած բանի վրա հայտարարել այս կամ այն բանը։ Ծառուկյան դաշինքում ամենակարևորը, որ պետք է  արձանագրեմ, որը ողջունելի է և դրական, ցանկացած հարց քննարկվում է և մոտեցումներն արձանագրվում են, և սովորաբար անգամ հարց չի առաջանում այսպես թե այնպես քվեարկել։ Քաղաքական թիմ է, որն իր գործունեությամբ  է զբաղված։ Կհասնի՞ այդ փուլը, կխոսենք այդ մասին։

Ամենաընթերցվածը