Ոչ ոք ոչնչից չէր վախենում, ուղղակի այլ կերպ էի պատկերացնում իմ աշխատանքը

    • Հարցազրույց - 10 Ապրիլի 2017, 19:57
Lragir.am-ի զրուցակիցն է դերասան, Երևանի ավագանու անդամ Հրանտ Թոխատյանը

Պարոն Թոխատյան, հրապարակվել է Երևանի ավագանու ընտրություններում ՀՀԿ ցուցակը, այնտեղ ձեր անունը չկա, ինչո՞վ է դա պայմանավորված:

Առաջին հերթին իմ մեծ զբաղվածությամբ է դա պայմանավորված: Մանավանդ այս տարի շատ զբաղված եմ: Երկրորդ, ես իմ գործունեությունն արդյունավետ չէի համարում:

Ինչո՞ւ, հնարավորություն չտվեցի՞ն աշխատել, թե այլ պատճառ կա:

Ոչ ոք ոչնչից չէր վախենում, ուղղակի ես ավելի այլ կերպ էի պատկերացնում իմ աշխատանքը, բայց պարզվեց, որ դա ուրիշ բան է:

Ի՞նչ կերպ էինք պատկերացնում այդ աշխատանքը: Ինչ-որ բան էիք ուզում անել, չկարողացա՞ք:

Այն ինչ կարող եմ անել քաղաքի համար, առանց ավագանու անդամ լինելու ավելի հեշտ կանեմ, և հիմա ավելի հանգիստ եմ:

Դուք երկար ժամանակ լռեցիք, բայց մի պահից սկսեցիք դեմ հանդես գալ Երևանի արտաքին տեսքի աղավաղմանը, հին ճարտարապետության ոչնչացմանը: Ի՞նչ էր կատարվում, ինչպե՞ս եք գնահատում Երևանի իշխանությունների աշխատանքը:

Յուրաքանչյուր աշխատանքում կան իրենց դրական ու բացասական կողմերը: Տվյալ դեպքում, ես կարծում եմ, որ համենայնդեպս այս քաղաքապետարանն այս քաղաքապետի գլխավորությամբ ոչ ամենավատն էր վերջին տարիներին եղած կազմից:

Բայց լավն էլ չէր:

Դե գիտեք ինչ, երբեք ոչ մի բան մինչև վերջ լավը չի լինում, այդպես չի կարելի ասել: Երկրորդ, ես ամբողջ մեր ներքին խոհանոցին ծանոթ չեմ, տեսնում եմ այն, ինչ տեսնում եմ: Ես քաղաքը տեսնում եմ կանաչ, տեսնում եմ լուսավոր:

Բայց տեսնում եք նաև հին Երևանի ոչնչացումը:

Դա էլ ենք տեսնում, իհարկե: Ես իմ գնահատականներն այդ մասին հնչեցրել եմ: Հիմա դուք ինձ հարցեր եք տալիս, որոնց պատասխանելն ինձ համար դժվար է:

Բայց Դուք Երևանու ավագանու անդամ եք եղել, պետք է լավ տեղյակ լինեք Երևանի խնդիրներին:

Ես ինչ իմացել եմ, դրանց մասին ժամանակին ասել եմ:

Երևանի ավագանին ձևական կառո՞ւյց եք համարում, թե՞ այն կարող է խնդիրներ լուծել, եթե ցանկանա:

Ոչ, ձևական կառույց չէ: Ես կարծում եմ, որ ավագանին կարող է գործել էլ ավելի արդյունավետ: Ինքը գործում է, բայց կարող է էլ ավելի լավը լինել:

Ավագանին հարց լուծող մարմի՞ն է, թե՞ մեկ մարդ է հիմնական որոշումները կայացնում՝ քաղաքապետը:

Ոչ, այդպես չէ, հարց լուծող մարմին է: Շատ հարցեր կան, որոնք լուծում է հենց ավագանին:

Դուք ի՞նչ փոփոխություն եք ակնկալում տեսնել Երևանում:

Մի ժամանակ ուզում էինք մաքուր քաղաք, հիմա համեմատաբար մաքուր է քաղաք, համեմատաբար լուսավոր է, համեմատաբար կանաչ: Կուզենայի, որպեսզի դա լիներ ավելին, որպեսզի ճարտարապետական ավելի շատ մոտեցում լիներ քաղաքին: Երևանի դեմքը երևանցին է: Լավ կլիներ, որ երևանցին էլ կրթվեր մի քիչ:

Իսկ անցած տարիներին չնկատեցի՞ք, թե քաղաքապետարանի պաշտոնյաները բյուջեից ինչ ճոխ ծախսեր արեցին գործուղումների, նվերներ գնելու, տոնակատարությունների համար: Այս հարցը շատ քննարկվեց, որ աղքատության ավելի քան 30 տոկոսանոց ցուցանիշ ունեցող երկրում հարյուրավոր միլիոններ են վատնվում:

Քաղաքի համար նախատեսված բյուջեն իր մեջ պարունակում է ամեն ինչ՝ և այցելություններ, և տոնակատարություններ: Չի կարող ամեն ինչ գորշ գույն ունենալ, չենք կարող ասել՝ եկեք որևէ տոն չանենք էս երկրում:

Անենք, բայց կարելի է համեստ միջոցներ ուղղել դրանց:

Եթե դուք նկատեցիք, անցյալ տարվանից՝ ապրիլյան պատերազմից սկսած ծախսերը բավական նվազեցին: Ավելի շատ գնաց դեպի օգնություն, դեպի վիրավոր ազատամարտիկները, նրանց բուժմանը: Սկսեցին վերջապես էս երկրում արվեստագետներին բնակարաններ տալ՝ սիմֆոնիկ նվագախմբի երաժիշտներից մինչև դերասաններ:

Հանրության քննադատըություններից հետո, այո, սկսեցին կրճատել որոշ ծախսեր, բայց դուք ի՞նչ եք կարծում, այդ ծախսերը համահո՞ւնչ են աղքատ երկրի վիճակին:

Դա շատ բան հարց է, իմ պատասխանն էլ շատ՝ օ, չի կարելի նման ծախսեր անել, եկեք այսպես անենք, այնպես անենք... Այդպես չէ: Կան ինչ-որ բաներ, որոնցից ոչ ես, ոչ դուք լուր չունենք: Եթե մի բանն ակնառու լիներ քննադատելու համար, ապա կքննադատենք, եթե մի բանը բացատրվում է, թե ինչի համար է արվում, վաղը դրա հետևանքով ինչ կարող է լինել, որոշ դեպքերում փորձում ես հասկանալ, որ ուրեմն պետք է:

Մենք վերջին տարիներին նաև տեսնում ենք, որ Երևանում չի լուծվում հասարակական տրանսպորտի խնդիրը: Ինչպե՞ս եք այս հարցին վերաբերվում:

Քայլեր արվում են, հիմա կան երկու ընկերություններ, որոնք եկել են մեր քաղաք, աշխատանք են տանում, որպեսզի տրանսպորտային ամբողջ համակարգը կարողանան կարգավորել, որպեսզի էս չլուտ մեքենաները դուրս գան գծերից: Դրանց փոխարեն լինելու են ավելի բարեկարգ ավտոբուսներ:

Եթե ամփոփեք նախորդ տարիների աշխատանքը, Երևանի ավագանին ու պաշտոնյաները արդյունավե՞տ են գործել:

Թարմությունը միշտ լավ բան է, ես միշտ դրա կողմնակից եմ: Դա բոլոր բնագավառներին է վերաբերում, պետք է գան երիտասարդները, մի փոքր ավելի շատ ժամանակ տրամադրեն իրենց աշխատանքին: Ես, օրինակ, չունեի այդ հնարավորությունը: Եթե պրոֆեսիոնալ աշխատանքի ու ավագանու աշխատանքի միջև էր ընտրությունը, բնականաբար, հաղթում էր իմ պրոֆեսիոնալ գործունեությունը:

Ամենաընթերցվածը