Եթե կրակոցն իրենց համար խաղ է, մեզ համար դա կոչվում է նախընտրական բանդիտիզմ

    • Հարցազրույց - 15 Մարտի 2017, 10:43
Ջրառատում տեղի ունեցած բախումների շուրջ զրուցել ենք «Համախմբում» կուսակցության փոխնախագահ, «Օհանյան-Րաֆֆի-Օսկանյան» դաշինքի թեկնածու Ստեփան Մարգարյանի հետ

Պարոն Մարգարյան, իշխող Հանրապետական կուսակցությունն արդեն անդրադարձել է Ջրառատ գյուղում տեղի ունեցածին։ Մասնավորապես ՀՀԿ փոխնախագահ Արմեն Աշոտյանը հայտարարել է, որ «ՕՐՕ դաշինքի ռեյտինգի բարձրացման խաղը չենք խաղալու»։ Ինչպիսի՞ն է ձեր գնահատականը ՀՀԿ արձագանքին։

Ես իշխանություններից ակնկալում եմ դեպքերի գնահատական և տեղի ունեցածի վերաբերյալ ադեկվատ քայլեր։ Եթե մեզ վրա կրակում են, ու եթե դա իրենց համար խաղ է, մեզ համար դա կոչվում է նախընտրական բանդիտիզմ։ Ես այդ ուղղությամբ իշխանություններից սպասում եմ լուրջ, կոնկրետ քայլեր, որովհետև երբ երկու օր առաջ եղավ առաջին դեպքը, մեկնաբանություն եղավ, որ այդ կրակոցով իբր ինչ-որ մեկը հերոսաբար ինչ-որ բան է կանխել։ Այդ կրակողի նկատմամբ որևէ բան կա՞ հարուցված, թե ոչ։ Այդ մեկնաբանության հետևանքը արդեն երկրորդ դեպքն էր, որովհետև դա թույլ տվեց որոշ մարդկանց մտածել, որ ամենաթողությունը խրախուսվում է։ Ես միայն ուզում եմ ասել, որ սա իրենց կողմից լավագույն ձևը չի, ինչ-որ հիմա արվում է։ Եթե անգամ ինձ հարցնեք, թե ով է կազմակերպում, տեղական լոկալ բան է, թե ոչ, ինձ դա չի հետաքրքրում։ Գյուղապետարանում եղել են թաքնված մարդիկ՝ զինված ինքնաձիգով, դանակներով և լոմերով, որով հարձակվել են մարդկանց վրա։ Սկզբից հարձակվել են 16 տարեկան դպրոցական երեխայի վրա, լոմի հարվածով կոտրել են ձեռքը, հիմա վիրահատելու են այդ տղային։ Դրանից հետո կրակոցով մարդ են վիրավորել, հետո դանակներով բազմաթիվ հարվածներ են հասցրել մյուսներին։ Երկուսին արդեն վիրահատել են, երրորդին էլ պետք է վիրահատեն։ Եվս մեկ վիրավոր կա, որին տեղափոխել են Երևան, բայց դեռ չգիտենք՝ որ հիվանդանոցում է։

Բոլորը ձեր համակիրնե՞րն են։

Այո, բոլորը, որովհետև սա ոչ թե ինչ-որ վեճի արդյունք է, այլ կազմակերպված հարձակում, և հարձակվողների մեջ եղել է գյուղապետն ինքը՝ ՏԻՄ ղեկավարը, որը պարզապես օրենքով պարտավոր է բնականոն նախընտրական հանդիպումներ կազմակերպել։ Նախորդ անգամվա սադրանքն իր կողմից է եղել, ով հայհոյելով և սպառնալով մարդկանց ստիպել է, թե ցրվեք, իսկ երեկ գյուղապետարանից են դուրս եկել ու հարձակվել մարդկանց վրա։ Դրան ի՞նչ անուն կարող ենք տալ։

Իսկ ի՞նչ քայլերի եք դիմելու։ Փաստորեն, ոստիկանության պարզաբանումն այս առնչությամբ ձեզ համար սպառիչ չէր։

Ես, անկեղծ ասած, դեռ ծանոթ չեմ, թե երեկվա դեպքի համար ինչ են պարզաբանել։ Ես հայտարարում եմ, որ այն, որ իշխանության մարմնում թաքնված մարդիկ հարձակվում են մարդկանց վրա, դա բանդիտիզմ է։ Ես չեմ կարող գնահատական տալ, ի՞նչ բացատրության մասին է խոսքը։ Բացատրությունը կլինի  նրանց նկատմամբ միջոցներ ձեռնարկելը։ Նրանք երկու օր առաջվա դեպքերից հետևություններ չարեցին։ Ի դեպ, այդ օրը ոչ միայն ատրճանակից կրակոց է եղել, այլև ավտոմատի կրակոց։ Եթե նրանք դրանից հետևություն չեն անում, եթե ոստիկանության ներկայությամբ ավտոմատներով ու դանակներով զինված դուրս են գալիս, այստեղ ոչ թե օդում ինչ-որ մեկնաբանություններ են հարկավոր, ռեյտինգի բարձրացում կամ չգիտեմ ինչ, այլ շատ ավելի լուրջ իրավիճակ է, շատ ավելի լուրջ, քան, ասենք, ռեյտինգը կամ ընտրությունները։ Իրենցից մենք սպասում ենք ոչ թե ինչ-որ անկապ խոսել, այլ նաև կոնկրետ քայլեր ձեռնարկել։

Ինչպե՞ս եք գնահատում քարոզարշավի առաջին 10 օրը։

Չգիտեմ, ես վախենում եմ, որ նման միջադեպերը նորմ են դառնում և դժվարանում եմ ասել նաև, թե ինչ կլինի առաջիկայում։ Կանխագուշակելը կամ ենթադրություն անելը լավ բան չի խոստանում, որովհետև ես չեմ զգում, որ իշխանությունը հետևություններ է անում և կանխարգելման քայլեր է ձեռնարկում։

Ձեր կարծիքով, իշխանությունը խիստ կվարվի՞ Երանոսյանների հետ, որոնց անունը շոշափվում է այս միջադեպի հետ կապված՝ հաշվի առնելով նաև հասարակության դժգոհությունը նրանց հանդեպ։

Այդ հարցը պետք է իրենց ուղղել, ես կդժվարանամ պատասխանել։

Իսկ կպահանջե՞ք նրա հրաժարականը։

Երբ քրեական իրավիճակ է ստեղծվում, հրաժարական պահանջել-չպահանջելը անտեղի է։ Հարցը այս պահին ոչ թե քաղաքական է, այլ նաև քրեական։ Սա արդեն լրիվ իրավապահ մարմինների խնդիրն է։

Իսկ նման միջադեպերը կարո՞ղ են լրջորեն ազդեն իշխանության վարկանիշի վրա։

Ես կարծում եմ՝ հասարակությունը դրա գնահատականը կտա, որովհտև բոլորն են դեմ դրան։