Գործարարության «այբբենարան» կանանց համար

ԵՐԵՎԱՆ, 7 ՕԳՈՍՏՈՍԻ, «ՓԱՍՏԻՆՖՈ»: Ինչպես արդեն հաղորդել ենք ս/թ օգոստոսի 1-ին Հայաստանի գործատուների միությունը և «Օրանժ Արմենիա» ՓԲԸ-ն կազմակերպել էին կանանց ձեռներեցության հիմնախնդիրներին նվիրված կլոր սեղան` փոքր ու միջին բիզնեսի կին ներկայացուցիչների մասնակցությամբ: Եռօրյա այդ միջոցառումներից հետո նույն ծրագրի շրջանակներում այսօր մեկնարկեց նոր տեսական պարապմունքների 5-օրյա շարք` հասցեագրված գործարարության մեջ առաջին քայլերը կատարող կանանց:

Միջոցառման մասնակիցներին կներկայացվի բիզնես վարելու այբուբենը և առաջնային նշանակության այնպիսի գիտելիքներ, որոնք անհրաժեշտ են սկսած գործը հաջողությամբ զարգացնելու համար:

Ինչպե՞ս հետազոտել շուկան, ի՞նչ գործոններ են անդրադառնում սպառողի վարքագծի վրա, փոքր ու միջին ձեռնարկությունները և հարկային օրենսդրությունը, աշխատանքային օրենսդրությունը և աշխատանքային պայմանագիրը, բիզնես պլանի կառուցվածքը, նշանակությունը և համանման այլ փաստաթղթեր կազմելու մեթոդաբանության թեմաներով հանդես կգան ՀԳՀՄ-ի և գործընկեր կազմակերպությունների փորձագետները, հաջողություններ արձանագրած ձեռներեցներ, իրավաբաններ և օրենսդրության մասնագետներ:

«Կանանց ձեռնարկատիրության զարգացման ճյուղային միության նախագահ» Քնարիկ Մալխասյանն այսօր հրապարակեց իրենց կողմից անցկացված մի հետազոտության արդյունքներ: Երբ հարց է ուղղվել գործատուներին, թե մարդու ո՞ր հատկանիշներն են առաջնային հաջող ձեռնարկատեր լինելու համար, հարցման ընդարձակ սանդղակում առաջին չորս տեղերը հերթականությամբ զբաղեցրել են հետևյալ պատասխանները` 1.գիտելիքները, 2.ձեռներեցությունը, 3.հմտությունը, 4.անհատական հատկանիշները:

Ինչպես «Փաստինֆո» լրատվական գործակալության թղթակցին տեղեկացրեց ՀԳՀՄ նախագահ Գագիկ Մակարյանը, միջոցառումների շարքը կշարունակվի գրեթե մինչև օգոստոսի վերջը: Այդ ընթացքում ևս մի խումբ սկսնակ գործարար կանանց հետ կիրականցվի պարապմունքների համանման շարք, որից հետո բոլոր 3 միջոցառումների մասնակիցները համատեղ կհավաքվեն, կկիսվեն ստացած իրենց տպավորություններով, մտքեր կփոխանակեն ձեռք բերած գիտելիքների և հմտությունների վերաբերյալ, վերջապես կգնահատեն նաև կազմակերպիչների աշխատանքը: