Հայփոստն ու Իտալիայի փոստը սկսում են համագործակցությունը

Հայփոստը նոր ծառայությունների ներդրման համար կօգտագործի Եվրոպայի առաջատար փոստային օպերատորներից մեկի` Իտալիայի փոստի հաջողված փորձը: Այս մասին այսօր կայացած մամուլի ասուլիսում հայտարարեց «Հայփոստ թրասթ մենեջմենթի» գլխավոր տնօրեն Խուան Պաբլո Գեչիջյանը. «Այս ծրագիրը կմեծացնի Հայփոստի սոցիալական ներգրավվածությունը Հայաստանի մարզերում, ինչը շատ կարևոր է»,- նշեց «Հայփոստ թրասթ մենեջմենթի» գլխավոր տնօրեն Խուան Պաբլո Գեչիջյանը:

Պոստե Իտալիանեի կողմից ծրագրի ղեկավար Ալբերտո Բուտարոնին նշեց, որ իրենց խումբն արդեն ուսումնասիրություններ է կատարել եւ պատրաստ է սկսելու աշխատանքները Հայաստանում. «Սրանով մենք, դուրս գալով Իտալիայի սահմաններից, մեր հաջողակ փորձն ենք փոխանցում Հայփոստին»: Խոսելով Պոստե Իտալիանեի հաջողության մասին` ծրագրի ղեկավարն ընդգծեց. «Մեզ համար շատ կարևոր սկզբունք է. նույն որակի ծառայություն բոլոր հաճախորդներին, չմոռանալ ոչ մեկին: Այդ սկզբունքը կկիրառվի Հայաստանի թե՛ քաղաքներում, թե՛ հեռավոր գյուղերում»:

Հայփոստի և Պոստե Իտալիանեի միջև կնքված պայմանագրի համաձայն` Համագործակցության հիմնական ոլորտներն են.

- Փոստային բաժանմունքների ցանցի զարգացում.

ա) ցանցի բարելավում և կազմակերպական մոդելների ձևավորում,

բ) շահագործական և կոմերցիոն գործընթացների սահմանում,

գ) վաճառքի ուղիների և կազմակերպման կառավարում,

- Ֆինանսական ապրանքների փաթեթի սահմանում և իրացում.

ա) գործառնական ապրանքներ, ընթացիկ հաշիվներ և քարտեր,

բ) վարկեր, միկրո վարկեր, ապահովագրություն:

Փոստային և ֆինանսական ծառայություններից բացի` Հայփոստի ժամանականակից տեխնիկական միջոցներով հագեցած նորացված բաժանմունքներն այսօր ապահովում են բարձր արագության ինտերնետ, հնարավորություն են տալիս բաժանորդագրվելու հայկական և արտերկրյա պարբերականներին, պատվիրելու ապրանքներ, որոնք այսօր հասանելի են միայն քաղաքներում: Նոր բիզնես մոդելների, նոր առաջատար տեխնոլոգիաների և Հայաստանի ամբողջ տարածքում փոտային բաժանմունքների ֆիզիկական ենթակառուցվածքի արդիականացմանն ուղղված խոշոր ներդրումների նպատակն է իրականություն դարձնել Հայփոստի հետևյալ սկզբունքները` արդիականություն, միջազգային պրոյեկցիա, զարգացում:

Պոստե Իտալիանեն 4-րդ տեղն է զբաղեցրել Fortune ամսագրի ամենահեղինակավոր ընկերությունների ցանկում` 21.7 մլրդ եվրո շրջանառությամբ, 846 մլն եվրո զուտ շահույթով: Պոստե Իտալիանեն սպասարկում է ավելի քան 5 միլիոն ընթացիկ հաշիվներ, 14 մլն դեբետային և կանխավճարային քարտեր: Պոստե Իտալիանեն Իտալիայում կյանքի ապահովագրության ծառայության խոշորագույն մատուցողն է:

«Հայփոստ թրասթ մենեջմենթ» ԲՎ

«Հայփոստ» ՓԲԸ