՛՛MosShoes-2016՛՛. գործարար կապերի նոր հարթակ՝ հայկական կոշիկ արտադրողների համար

  • Բիզնես - 13 Սեպտեմբերի 2016, 14:05
Հայաստանի զարգացման հիմնադրամի աջակցությամբ մեր երկրի 10 ընկերություններ մեկ միասնական տաղավարով սեպտեմբերի 13-16-ը մասնակցում են Մոսկվայում այսօր բացված ՛՛MosShoes-2016՛՛ միջազգային ցուցահանդեսին, որը կոշիկի և կաշվե պարագաների արտադրության Ռուսաստանի և Արևելյան Եվրոպայի խոշորագույն ցուցահանդեսն է: Հայկական ընկերությունները մասնագիտացված միջազգային այս ցուցահանդեսին մասնակցում են արդեն երրորդ անգամ:

՛՛MosShoes՛՛ 69-րդ միջազգային ցուցահանդեսին հայկական ընկերությունների մասնակցությունը Հիմնադրամի կողմից ապահովվել է արտահանմանն ուղղված արդյունաբերական քաղաքականության ռազմավարությամբ նախատեսված միջոցառումների շրջանակում:

«Հայկական ընկերությունների մասնակցությունը կազմակերպել ենք հինականում արտահանման խթանման և հայկական արտադրանքի ճանաչելիության բարձրացման նպատակով: Տարեկան այս ցուցահանդես է այցելում ավելի քան 12 000 մարդ՝ հիմնականում մեծածախ գնորդներ և ոլորտի մասնագետներ, և սա մեր արտադրողների համար նաև լրացուցիչ ճանապարհ է՝ միջազգային շուկա մուտք գործելու և նոր գնորդներ ձեռք բերելու համար»,- նշել է Հայաստանի զարգացման հիմնադրամի գործադիր տնօրեն Կարէն Մկրտիչեանը:

Հայաստանի զարգացման հիմնադրամի լրատվական ծառայություն