Երեկ ուշ երեկոյան, ըստ նախնական տեղեկությունների, հրազենով ինքնասպան է եղել հայտնի գործարար Միշա Հայրապետյանը (Քալանթարյան):
Հայրապետյան ընտանիքին են պատկանում Երևանի Գաջի գործարանը, «Հայաստան» հանրախանութը, ձիարշավարանը, BMW խանութների ցանցը:
Միշայի թոռնուհին վերջերս ամուսնացել էր Սերժ Սարգսյանի եղբոր` Սաշիկ Սարգսյանի որդու հետ:
Հրապարակ թերթը վերջերս գրել էր Հայրապետյան ընտանիքի ֆինանսական խնդիրների մասին:
Փայլակ Հայրապետյանը գրավադրել է իր ողջ գույքը, այդ թվում «Հայաստան» հանրախանութը` Սիերա Լիոնեում ադամանդի հանք ձեռք բերելու գործարքին մասնակցելու նպատակով, և գործընկերոջ` Աշոտ Սուքիասյանի կողմից խաբվել: Այժմ «Ամերիաբանկը» չմարված վարկի դիմաց փորձում է բռնագրավել նրանց գույքը:
Այս ընտանիքը հայտնի է դեռևս սովետական տարիներից, նրանց էր պատկանում «Էրեբունի» տրիկոտաժի միավորումը, հետագայում` գաջի գործարանը, Չարբախի ձիարշավարանը: Նրանք Սևանի ափին գտնվող Ծովազարդ գյուղից են, որտեղ նույնպես սեփականության իրավունքով իրենց պատկանող հյուրանոց և տարածքներ ունեն:
Ինքնասպանություն գործած գործարար Միշա Քալանթարյանի դիակի արտաքին զննությամբ ստորին ծնոտի ստոր կզակային և գլխի աջ ճակատային շրջաններում հայտնաբերվել են հրազենային վնասվածքներ:
Ըստ «Փաստինֆո» գործակալության ունեցած տեղեկությունների, Միշա Քալանթարյանի ինքնասպանության վերաբերյալ ոստիկանության բաժնում առաջին ահազանգը ստացվել է 2012թ. օգոստոսի 17-ին ժամը 22:45-ի սահմաններում: Դեպքի վայր մեկնած օպերատիվ խումբը տան առաջին հարկի ննջասենյակներից մեկում հայտնաբերել է Միշա Հայրոյի Քալանթարյանի /ծնված 1942թ./ դիակը` գլխի շրջանում հրազենային վնասվածքով: Դիակի ոտքերի մոտ` հատակին, հայտնաբերվել է ՏՏ տեսակի ատրճանակ, որի փամփշտոցում հայտնաբերվել է կրակված մեկ պարկուճ, որը կրակոցից հետո դուրս չի շպրտվել, իսկ պահունակում` 6 փամփուշտ:
Դեպքի առթիվ ՀՀ ոստիկանության Էրեբունու բաժնում օգոստոսի 18-ի որոշմամբ քրեական գործ է հարուցվել ՀՀ քրեական օրենսգրքի 110-րդ հոդվածի 1-ին մասով և 235-րդ հոդվածի 1-ին մասով` համապատասխանաբար ինքնասպանության հասցնելը և ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը:
Նշանակվել են դատաբժշկական, դատաձգաբանական և դատաքիմիական փորձաքննություններ:
«Թող տեղերով փոխվեն՝ ժողովուրդը ղեկավարի, իրենք վայելեն»
Գազի գինը հնարավոր է իջեցնել
Ատոմակայանում կադրերի հոսունություն է նկատվում
Վարչապետը խոսել է իր քաղած դասերի մասին
