Մենք ենք այս քաղաքի տերը. Էկոլոգիական հանձնաժողովը կգործի, եթե քաղաքացին կարողանա ազդել որոշումների վրա:
Սույն թվականի օգոստոսի 8-ին Երևանի քաղաքապետարանում տեղի է ունեցել քաղաքաշինական խորհրդի էկոլոգիական հանձնաժողովի անդրանիկ նիստը, որին մասնակցել են նաև «Մենք ենք այս քաղաքի տերը» քաղաքացիական նախաձեռնության ներկայացուցիչները: Նախօրեին մենք հրապարակել էինք մեր դիրքորոշումը՝ հանձնաժողովի աշխատանքներին մեր մասնակցությունը պայմանավորելով այդ մարմնի իրական լիազորությունների և որոշումների կայացմանը քաղաքացիների մասնակցության իրական մեխանիզմների առկայությամբ:
Նիստի ընթացքում մենք բարձրացրել ենք այդ հարցերը, ինչպես նաև Երևանի հանրային տարածքների ոչնչացման ահռելի ծավալների, Երևանի գլխավոր հատակագիծ-օրենքից բազմաթիվ շեղումների և ոտնահարումների ու նման դեպքերում քաղաքացիների կողմից քաղաքապետարանի որոշումների վրա ազդելու և նախագծերի օրինականությունը ճշտելու հնարավորության հիմնախնդիրները:
Ի պատասխան՝ Երևանի քաղաքապետ Տարոն Մարգարյանը և հանձնաժողովի նախագահ Կարինե Դանիելյանը հավաստիացրել են, որ բոլոր նշված հարցերը քննարկվելու են հանձնաժողովի կողմից, և որ հանձնաժողովի տված եզրակացությունները որիշիչ դեր են ունենալու քաղաքապետարանի կողմից կայացվող համապատասխան որոշումների համար:
«Մենք ենք այս քաղաքի տերը» քաղաքացիական նախաձեռնության կողմից մասնավորապես բարձրացվել են հետևյալ հարցերը.
- Քաղաքաշինական նախագծերի վերաբերյալ բոլոր որոշումները կայացնելուց առաջ քաղաքապետարանը պետք է իրազեկի քաղաքացիներին դրանց մասին՝ ապահովելով նրանց իրական մասնակցությունը որոշումների կայացմանը (հանրային լսումներ, բաց քննարկումներ և այլն):
- Անկախ հանգամանքներից՝ գերակա պետք է լինի Երևանի գլխավոր հատակագիծ-օրենքը և դրանում նշված որևէ կանաչ քառակուսի չպետք է կառուցապատվի:
- Ցանկացած ահազանգի դեպքում քաղաքացիները պետք է հնարավորություն ունենան քաղաքապետարանից ամբողջական տեղեկատվություն ստանալ խնդրի վերաբերյալ:
- Ապօրինի շինարարության և ծառահատման մասին ահազանգ ստանալու դեպքում քաղաքապետարանի համապատասխան բաժնի աշխատակիցները պետք է անհապաղ արձագանքեն և դադարեցնեն այդ աշխատանքները և մեղավոր անձանց պատասխանատվության ենթարկելու առաջարկով դիմեն իրավասու մարմիններին:
Հանձնաժողովի անդամ մասնագետ էկոլոգները ևս բազմաթիվ հրատապ հարցեր են բարձրացրել և ընդհանուր առմամբ հաստատել այն փաստը, որ Երևանը կանգնած է էկոլոգիական լրջագույն խնդիրների, հանրային տարածքների կորստի և անապատացման առջև: Բացի այդ, խնդիր կա նաև տարբեր մարմինների՝ Երևանի քաղաքապետարանի, քաղաքաշինության նախարարության և բնապահպանության նախարարության աշխատանքների համակարգման հարցում: Շատ հաճախ այս կառույցների քայլերը և կայացրած որոշումները հակասում են միմյանց:
«Մենք ենք այս քաղաքի տերը» քաղաքացիական նախաձեռնությունը մասնակցության դեպքում փորձելու է օգտագործել այս հանձնաժողովը՝ հետևյալ հարցերում իրական արդյունքների հասնելու համար.
- Քաղաքացիների համար ստեղծել իրական մեխանիզմներ քաղաքաշինական ծրագրերի օրինականությունը պարզելու և նրանց մասնակցությունը որոշումների կայացմանը հնարավոր դարձնելու համար:
- Վեր հանել Երևանի գլխավոր հատակագիծ-օրենքի բոլոր խախտումները և ապահովել դրա պահանջների կատարումը:
- Պատասխանատուներին ներկայացնել վերջին ամիսների ընթացքում քաղաքացիների կողմից հավաքված հանրային գոտիների ոչնչացման բազմաթիվ առանձին դեպքերը և հետամուտ լինել օրինականության վերականգնմանը:
- Բացահայտել հատակագիծ-օրենքի և այլ օրենքների խախտումներով հաստատված բոլոր որոշումների համար պատասխանատու պաշտոնյաներին և հետամուտ լինել, որպեսզի նրանք պատասխանատվության ենթարկվեն իրենց կայացրած օրինազանց որոշումների համար:
Մեր կարծիքով էկոլոգիական հանձնաժողովն իր նիստերում պետք է քննարկման առարկա դարձնի նաև մեղավոր պաշտոնատար անձանց պատասխանատվության ենթարկելու անհրաժեշտության հարցը և համապատասխան միջնորդությամբ դիմի նաև քաղաքապետին և իրավասու մարմիններին: Պատասխանատվության կանչվելու և ենթարկելու դեպքերում միայն կարող են հաստատվել կարգուկանոն և յուրաքանչյուր պետական և տեղական ծառայողի պարտավորեցնել գործել միմիայն Սահմանադրության և օրենքի շրջանակներում:
Մենք կարծում ենք նաև, որ քաղաքապետարանը պարտավոր է հաշվետու և թափանցիկ լինել քաղաքացու առջև և ծառայել հանրային շահին: Մեր բոլոր քայլերի մասին մենք կտեղեկացնենք հրապարակավ և ամեն ինչ կանենք, որ վերոհիշյալ հարցադրումները և պահանջները իրական լուծումներ ստանան:
«Մե՛նք ենք այս քաղաքի տերը»
քաղաքացիական նախաձեռնություն
10-ը օգոստոսի 2012թ.
Զոհված զինծառայողին հուղարկավորեցին
Ցույց կառավարության շենքի մոտ
Սեյրան Օհանյանը պատմել է սպանության մանրամասները
Նախարարն ու ոստիկանապետը զոհվածի ծնողների հետ գնացին գյուղ
Ոստիկանները հարձակվել են լրագրողների վրա եւ խլել նկարահանող սարքերը
