ԵՐԵՎԱՆ, 10 ՕԳՈՍՏՈՍԻ, «ՓԱՍՏԻՆՖՈ»: Սիսիանում սեպտեմբերի 9-ին կայանալիք քաղաքապետի ընտրություններում օգոստոսի 9-ին ինքնաառաջադրվել է ՀՅԴ անդամ Տիգրան Պողոսյանը, Ագարակում` հանրապետական Սամվել Միքայելյանը: Մյուս քաղաքային համայնքներում նոր առաջադրումներ չեն եղել: Այս մասին «Փաստինֆո» գործակալության թղթակցին հայտնեցին Կենտրոնական ընտրական հանձնաժողովից:
Այսպիսով` Սիսիանում առաջադրված է երկու թեկնածու: Ավելի վաղ «Բարգավաճ Հայաստան» կուսակցության կողմից առաջադրվել էր գործող քաղաքապետ, ԲՀԿ-ական Աղասի Հակոբջանյանը:
Ագարակում ևս առաջադրված է երկու թեկնածու: Ավելի վաղ ՀՀԿ-ի կողմից առաջադրվել էր գործող քաղաքապետ, հանրապետական Մխիթար Զաքարյանը:
Կապանում առաջադրված է քաղաքապետի երեք թեկնածու: Ինքնաառաջադրվել են գործող քաղաքապետ, ՀՅԴ անդամ Արտուր Աթայանը և անկուսակցական Գագիկ Աթաջանյանը, ՀՀԿ-ի կողմից առաջադրվել է հանրապետական Աշոտ Հայրապետյանը:
Մեղրիում առաջադրված է քաղաքապետի երկու թեկնածու: ՀՀԿ-ի կողմից առաջադրվել է գործող քաղաքապետ, հանրապետական Սերգեյ Հայրապետյանը, ինքնաառաջադրվել է անհատ ձեռնարկատեր, անկուսակցական Արշավիր Հովհաննիսյանը:
Քաջարանում առաջադրված է երկու թեկնածու: ՀՀԿ-ի կողմից առաջադրված է գործող քաղաքապետ, հանրապետական Վարդան Գևորգյանը, ինքնաառաջադրված է անկուսակցական Ռաֆայել Լալայանը:
Դաստակերտում առաջադրված է երկու թեկնածու: ՀՀԿ-ի կողմից առաջադրվել է գործող քաղաքապետ, հանրապետական Նաիրի Փիլոսյանը, ինքնաառաջադրվել է անկուսակցական Սասուն Սարգսյանը:
Նշենք, որ Սյունիքի մարզի 109 համայնքներից 94-ում սեպտեմբերի 9-ին կայանալու են տեղական ինքնակառավարման մարմինների ընտրություններ:
Թեկնածուների առաջադրման գործընթացը մեկնարկել է օգոստոսի 5-ին և կտևի մինչև օգոստոսի 10-ի ժամը 18-ը:
