Սիրիահայերը շարունակում են դժգոհել, որ Հայաստանի կառավարությունը չի լուծում իրենց խնդիրները: Հայաստան ժամանած և Միգրացիոն պետական ծառայություն ու Սփյուռքի նախարարություն դիմած երկքաղաքացիություն ունեցող սիրիահայերն ասում են, որ միայն հատուկ կացարանում տեղավորված և Հայաստանի քաղաքցաիություն չունեցող ընտանիքներին են օգնում:
«Մայրս գնաց սփյուռքի նախարարություն, բայց ասել էին, որ միայն երեխաներին դպրոց, մանկապարտեզ տեղավորելու և այդ տիպի հարցերով են զբաղվում: Այլ օգնություն չկա», Lragir.am-ի հետ զրույցում ասաց Սիրիայից Հայաստան տեղափոխված Գոհար Ազիխանյանը, ում ամուսինը դեռևս Սիրիայում է:
Գոհարն ունի նաև Հայաստաի քաղաքացիություն, բայց զարմացած ասում է, որ պետությունն անգամ Սիրիայում գտնվող և նաև Հայաստանի քաղաքացիություն ունեցող անձանց տարահանումը չի կազմակերպում:
«Գոնե իր քաղաքացիներին օգնի էս երկիրը: Կացարանի հարցով ենք դիմել, ասում են՝ ընենց տուն ենք տալու, որ չեք մնա դրա մեջ: Մի քանի մահճակալ մի սենյակում են շարում, որ մարդկանց լցնեն իրար վրա: Մի խոսքով՝ բոմժանոց»,դժգոհեց նա՝ նշելով, որ այսօր ծնողների տանն է ապրում:
Գոհարի խոսքով՝ Սիրիայում գտնվող հայերի տրամադրություններն այնպիսին են, որ նրանք գերադասում են գնալ այլ երկիր, քան գալ Հայաստան: «Այնտեղի ժողովուրդն ասում են՝ ավելի լավ է պատերազմի մեջ մնանք, քան էս պայմաններով տեղափոխվենք Հայաստան», պատմեց նա:
Թեև արդեն հայտարարվել է, որ «Արմավիա» ավիաընկերությունը լրացուցիչ չվերթներ է իրականացնելու դեպի Հալեպ, սակայն Սիրիայից ստացված տեղեկությունների համաձայն՝ դեպի Հայաստան ինքնաթիռի տոմսեր չեն ճարվում, մարդիկ հերթի մեջ սպասում են:
Սիրիահայ կանացից մեկն էլ, ով իր երկու անչափահաս երեխաների հետ է եկել Հայաստան, սպասում է ամուսնու ժամանմանը, որպեսզի կարողանան լուծել իրենց կեցության և աշխատքնի հարցը: «Ամուսինս մինչև սեպտմեբեր աշխատանքը կդասավորի և կգա: Տեսնենք, այստեղ ինչ աշխատանք և ինչ կացարան կգտնենք»,ասաց սիրիահայ կինը, ով չցանկացավ, որպեսզի իր անունը հրապարակենք:
Նա նույնպես երկքաղաքացիություն ունի, դիմել է Միգրացիոն պետական ծառայություն, սակայն ոչ մի հստակ պատասխան: Ասել են, որ պետությունը սնունդով և այլ հարցերում աջակցում է միայն հատուկ կացարանում բնակվող սիրիահայ ընտանքիներին:
«Հատուկ կացարան էլ հանրակացարան է, ոչ մի պայման, բաղնիքն ու խահանոցն էլ ընդհանուր է՝ դրսում: Ես երկու անչափահաս երեխաների հետ ո՞նց ապրեի այդ կացարանում», հարցադրում է անում սիրիահայ կինը:
Նա իր երեխաների հետ ապրում է հարազատնի տանը: «Ինը հոգանոց ընտանիքով մի փոքր տանն ենք ապրում, մինչև ամուսինս գա, տեսնենք ինչ ենք անելու: Կարմիր խաչ էլ գնացինք, մեզ ոչ մի հստակ աջկցություն չառաջարկեցին: Ասացին, որ ավելի շատ աջակցելու են այն ընտանիքներին, որոնց անդամները Հայաստանի քաղաքացիություն չունեն, որ իրենց օտար չզգան, դուք այստեղ հարազատներ ունեք: Իսկ ես նաև Հայաստանի քաղաքացի եմ, ինձ ո՞վ պետք է աջակցի», նշեց նա: Սիրիահայերի խոսքով՝ շարունակվում են դժգոհությունները կապված ինքնաթիռի տոմսերի թանկ լինելու հետ:
Կարկուտից տուժած գյուղացիների վարկերը 3 տարով կսառեցվեն, գյուղացիները կազատվեն հողահարկից
Արդարադատության «հրեշտակները»
