«Նե-մեց մարդասպան, Նե-մեց մարդասպան”, “Նե-մեց հեռացիր, Հայաստանը մոռացիր» այսօր նման կոչերով հարյուրավոր մարդիկ Հարսնաքար ռեստորանի մոտ մոմավառություն են անցկացրել հունիսի 17-ին այդ ռեստորանում ծեծի ենթարկված ռազմական բժիշկ Վահե Ավետյանի հիշատակին, ով այդպես էլ գիտակցության չգալով, մահացել է հունիսի 29-ին:
Շատերի ձեռքին “Վահե Ավետյանը ես եմ” ցուցապաստառն էր, եկել էին ՀՀ քաղաքացիներ, արվեստագետներ, մտավորականներ: Լրագրող Ծովինար Նազարյանը փողոցով երթևեկող մեքենաների ուղևորներին և վարորդներին կոչ էր անում այսուհետ չգնալ Հարսնաքար, քանի որ այնտեղ մարդ է սպանվել:
Մի կին հեկեկում էր, թե միթե նրանց մեջ մի բարի մեկը չկար, որ կարողանար կանխեր, սա հանցագործություն է, վայրագության դրսևորում: Նա չէր հավատում գործի արդար քննությանը:
Սփյուռքահայերից մեկն էլ պաշտոն ստանձնածներին անպատասխանատու համարեց. “Ոչ ոքի հանդեպ հավատ չկա, հուսալքված են, բոլորի հեռանկարը, ցավոք, լքել -գնալն է”:
Հրապարակախոս Արա Նեդոլյանի խոսքով, ՀՀԿ-ն մնում է նույն ոչնչացնող, լկտի, անմարդկային ուժը, ինչ եղել է վերջին տարիներին, և ոչ միայն պետք է դրվի Ռուբեն Հայրապետյանի հրաժարականի հարցը, այլև իշխանության հանցավոր անգործունեության հարցը, ինչը նորմալ օրինական սահմանադրական կարգի տեսակետից պետք է որ ակնահայտ լիներ: Ռուբեն Հայրապետյանին, ըստ նրա, հնարավոր չէ զսպաշապիկ հագցնել, քանի որ նրա մեջքին կանգնած է ամբողջ քրեաօլիգարխիկ համակարգը: Բայց չնայած կեղծված ընտրություններին, հրապարակախոսի կարծիքով, հասարակական դիմադրությունը ոչ մի տեղ չի կորել, անգամ աճում է և անպայման իր համար գտնելու է բանական քաղաքական խողովակներ իրավիճակը փոխելու, որովհետև հասարակությունն ընտրություններից հետո այլևս չի նիրհում, չի գնում սուրճ խմելու, այդ անընդհատ հասարակական գիտակցությունը սկսում է արդեն հակազդել, ինչը հույս է տալիս, որ հասարակությունը կդառնա քաղաքացիական հասարակություն:
“Բանակն իրականում” նախաձեռնող խմբի անդամ, հրապարակախոս Զարուհի Հովհաննիսյանի խոսքով, Ռուբեն Հայրապետյանի նման մարդիկ, որոնք նստած են Ազգային ժողովում, քարոզում են բռնության մշակույթ, իրենց գոյությամբ, վարքուբարքով կյանքի նկատմամբ մոտեցումներով:
“Ռուբեն Հայրապետյանի ցանկացած հարցազրույց, ցանկացած հանրային ներկայացում բռնության մշակույթի քարոզ է, և այդ բռնության մշակույթի քարոզը հանգեցրեց մարդկային կորստի: Նրա ամբողջ կենսագործունեության ընթացքում շատերն են իր թիկնազորից կերել այդ ծեծը, որը միգուցե չի ավարտվել մահով, այսօր ավարտվեց մահով”, ասել է նա` ավելացնելով, որ, բռնատիրության մշակույթը իշխող վարչակարգի, իշխող հանրապետական կուսակցության հենասյունն է, և մականունավորները բռնության մշակույթ են քարոզում. “Մենք տեսանք լֆիկ կոչվող պատգամավորը ինչպես հարձակվեց խաղաղ ցուցարար Վարդգես Գասպարիի վրա: Այսօր հանրությունը վերջապես անհնազանդություն է հայտնում”, նշել է նա:Երբ ակցիայի մասնակցիները մոտեցան ռեստորանային համալիրին և մոմերը շարեցին շուրջբոլորը, իսկ պատերին էլ գրեցին` Հանցաքար և Սպանդանոց, նկատեցին, որ ռեստորանային համալիրում քեֆ-ուրախություն է, սկսեցին բղավել, փորձում էին համալիրից ներս մտնել. որոշ ժամանակ անց, ռեստորանի լույսերը հանգեցին, իսկ ակցիան կշարունակվի վաղը` ժամը 13:00 նախագահական նստավայրի մոտ:
«Թող տեղերով փոխվեն՝ ժողովուրդը ղեկավարի, իրենք վայելեն»
Գազի գինը հնարավոր է իջեցնել
Ատոմակայանում կադրերի հոսունություն է նկատվում
Վարչապետը խոսել է իր քաղած դասերի մասին
