Էրեբունի վարչական շրջանի Նոր Արեշի 35 փողոցի 127/1 հասցեում գտնվող չորրորդ կարգի վթարային հանրակացարանի բնակիչներին խոստացել են այս տարի լուծել բնակարանային հարցերը: Բնակիչներն ասում են, որ հույսով սպասում են իրենց նոր բնակարաններին: 2008 թվականից շենքի բնակիչները պայքարում են իրենց վերաբնակեցման համար, սակայն համապատասխան ֆինանսավորում չի հատկացվում այդ նպատակով:
Երևանի քաղաքապետարանը մի քանի տարի առաջ հատկացրել էր ֆինանսավորման իր չափաբաժինը: Անհրաժեշտ գումարի մի մասն էլ պետք է հատկացներ կառավարությունը, որպեզի երկու նոր շենք կառուցվի այս ընտանիքների վերաբնակեցման համար, սակայն հատկացում չի եղել:
Շենքի բնակիչներն ապրում են անմարդկային պայմաններում և ասում, որ վախը սրտներում են գիշերն անկողին մտնում: «Մեր պաշտոնյաները, որ մի գիշեր ըստեղ քնեն ու էս շենքի ճռռոցը լսեն, դա հերիք ա, որ մի քանի ամիս սթրես տանեն»,- ասում են մարդիկ: Վերջերս տեղի ունեցած երկրաշարժերի ժամանակ շենքի բանկիչներն ուժեղ ցնցումներ են զգացել: Նրանք դժգոհում են, որ տարիներ շարունակ աշխատել են այս պետության համար, սակայն պատասխան դեռ չեն ստանում:
«Դրա պատասխանին ենք սպասում, գոնե չնչին մասով մեզ փոխհատուցեն»,- ընդգծում են նրանք:
Հանրակացարանի բնակչությունը դժհոգում է աշխատատեղերի պակասից: Մարդիկ ասում են, որ եթե գոնե նորմալ վարձատրվող աշխատանք ունենային, կգնային և այլ շենքերում վարձակալությամբ կբնակվեին:
Շենքի ճաքերն ի հայտ են եկել դեռևս 90-ական թվականներին, իսկ պատճառն այն է, որ հանրակացարանը 70-ական թվականներին գրունտային ջրերի վրա է կառուցվել: Բնակիչներն արդեն անգիր են արել մասնագիտական եզրակացությունները և շտապում են տեղեկացնել, որ այդ տարածքում անգամ չէր կարելի կառուցել չորս հարկանի շենք, իսկ հանրակացարանը 8 հարկանի է:
Շենքն սպասարկող «Լույս» համատաիրության նախագահ Ալբերտ Գևորգյանը մեզ հետ զրույցում նշեց, որ Երևանի քաղաքապետ Տարոն Մարգարյանը խոստացել է այս տարի անպայման լուծել շենքի բնակիչների վերաբնակեցման հարցը: Բնակիչների գրությունն այսօր գտնվում է կառավարության վերահսկողական բաժնում: Դրանով Ալբերտ Գևորգյանն ու բնակիչները 1 մլրդ դրամ են պահանջում կառավարությունից, որպեսզի ավարտին հասցվեն Սիսակյան փողոցի անավարտ շենքի շինաշխատանքները և մեկ նոր շենք կառուցվի Մարգարյան փողոցում: Այդ շենքերում, բայցի վերոնշյալ ընտանիքներից, հնարավոր կլինի վերաբնակեցնել նաև մյուս վթարային շենքերի բնակիչներին:
Նշենք, որ Երևանում կա չորրորդ կարգի վթարային 10 շենք, որոնցից, քաղաքապետարանի որոշմամբ, առաջնահերթ պետք է լուծում տրվի հենց այս շենքի բնակիչների խնդիրներին:
Նոր Արեշի 35 փողոցի 127/1 հասցեում գտնվող հանրակացարանում 150 ընտանիք է բնակվում` 500 մարդ, որոնց մի մասը երեխաներ են:
Լսեցի՞ք, ինչ ասացի
Արկադի Վարդանյանը կասկածվում է սպանություն նախապատրաստելու մեջ
ԲՀԿ խմբակցության պատգամավորն իրեն անկիրթ է պահել
