Արամ Սարգսյանի հայտարարությունը

Ինչպես հայտնի է, Հանրապետություն կուսակցության ղեկավար Արամ Զավենի Սարգսյանը մայիսի 11-ին հանդես է եկել խորհրդարանի մանդատը վայր դնելու, ինչպես նաեւ առաջիկա օրերին հետագա անելիքի մասին ներկուսակցական քննարկումներ իրականացնելու, ու նաեւ Հայ ազգային կոնգրեսի հետ գործակցությունը վերանայելու հնարավորության մասին հայտարարությամբ:

Ստորեւ ներկայացնում ենք  նրա հայտարարության ամբողջական տեքստը.

«Նախ ուզում եմ շնորհակալություն հայտնել իմ հրավերին արձագանքելու համար եւ խնդրել, որ այսօր պահպանենք ճեպազրույցի ձեւաչափը ու իմ քաղաքական հայտարարությամբ ավարտենք մեր հանդիպում»,-ասաց նա:

«Ինչպես գիտեք ես ասել էի, որ ՀԱԿ-ի խորհրդարան անցնելուց հետո հրաժարվելու եմ մանդատից եւ հիմա պաշտոնապես հայտարում եմ, որ վայր եմ դնում ԱԺ պատգամավորի իմ մանդատը ու հաջողություն եմ մաղթում ՀԱԿ-ին առաջիկա խորհրդարանական գործունեության մեջ:

Կանխելով ձեր հարցադրումները` հայտարարում եմ նաեւ, որ առաջիկայում կուսակցության ակտիվի հետ քննարկելու ենք ՀԱԿ-ի հետ մեր հետագա համագործակցության ձեւաչափը: Չի բացառվում նաեւ ՀԱԿ-ից դուրս գալու հեռանկարը:

Անցած ժամանակահատվածում մենք ունեցել ենք տարաձայնություններ ՀԱԿ-ի գործունեության վեկտորի, ներքաղաքական զարգացումների, արտաքին քաղաքական դիրքորոշումների շուրջ, որոնց մասին ազատորեն բարձրաձայնել եմ իմ կարծիքը:

Լինելով թիմային գործունեության մարդ, չկարեւորելով սեփական հավակնությունների հաստատումը, ես արել եմ հնարավորն ընդհանրական հաջողության համար: Խորապես համոզված եմ, որ մենք բոլորս արժանի ենք բոլորովին այլ Հայաստանի, քան ունենք:

Կուսակցության անդամների, քաղաքացիական հասարակության ներկայացուցիչների, շահագրգիռ անձանց քննարկումներից հետո «Հանրապետություն» կուսակցության առաջիկա համգումարում ծրագրային ելույթով կներկայացնեմ մեր պատկերացումները նոր Հայաստանի եւ մեր անցնելիք ճանապարհի մասին: Շնորհակալություն»: