Հանրապետություն կուսակցության նախագահ Արամ Զավենի Սարգսյանը մայիսի 11-ի ասուլիսի ընթացքում հայտարարել է, որ ինչպես ասել էր նախապես, վայր է դնում խորհրդարանի մանդատը: Արամ Սարգսյանը նշել է, որ դա իր քաղաքական որոշումն է եւ այն չի կայացրել մանդատը Կոնգրեսի համամասնական ցուցակի որեւէ անդամի զիջելու համար: Արամ Սարգսյանը նշել է, որ այդ իսկ պատճառով էլ իր համար նշանակություն չունի, թե ով կլինի այդ մանդատով խորհրդարան գնացողը Կոնգրեսից:
Արամ Սարգսյանը հայտարարել է նաեւ, որ առաջիկայում կուսակցության ակտիվի հետ քննարկումներ կլինեն հետագա գործունեության, անելիքի վերաբերյալ: Նա ասել է, որ չի բացառվում այդ քննարկումների արդյունքում Կոնգրեսից դուրս գալու որոշման կայացումը: Հանրապետություն կուսակցության ղեկավարը ասել է նաեւ, որ ինքը պատրաստվում է կուսակցության սեպտեմբերին կայանալիք համագումարում հանդես գալ Հայաստանի վերաբերյալ իրենց պատկերացումների վերաբերյալ ծրագրային ելույթով:
Արամ Սարգսյանն ասել է, որ քաղաքական դաշտում Հանրապետություն կուսակցությունը պատրաստ է գործակցել ցանկացած հասարակական եւ քաղաքական կազմակերպության հետ, բացառությամբ այն ուժերի, որոնք պատասխանատվություն են կրում Հայաստանում առկա ներկայիս իրավիճակի համար:
Խոսելով Հայ ազգային կոնգրեսի հետ տարաձայնությունների մասին, նա ասել է, որ դրանք առաջացել են նախորդ տարվա գարնանից: Հիշեցնենք, որ 2011 թվականի գարնանը Կոնգրեսը աննախադեպ բազմամարդ հանրահավաքներ էր անցկացնում, ինչից հետո եղավ իշխանության հետ երկխոսությունը:
Արամ Սարգսյանը նշել է, որ Կոնգրեսի հետ իրենց տարաձայնությունը վերաբերում է թե ներքին հարցերին, թե արտաքին քաղաքականության խնդիրներին:
Նա նշել է, որ ինքն այդ մասին չէր բարձրաձայնում, որովհետեւ հասարակության համար ընթացիկ քաղաքական գործընթացում՝ խորհրդարանի ընտրությանն ընդառաջ, շատ կարեւոր էր ընդդիմության համախմբվածությունը: Բայց այժմ այդ գործընթացը ավարտվել է, փաստում է Արամ Սարգսյանն ու նշում, որ դրա համար էլ իրենք բարձրաձայնում են տարաձայնության մասին:
Արամ Սարգսյանը նշել է, որ ցավոք Հայաստանի խորհրդրանը չդարձավ քաղաքական մարմին, հասարակության քվեն արտահայտող մարմին: Նրա խոսքով, հասարակության 90 տոկոսն ընդդիմադիր է, մինչդեռ խորհրդարանում ներկայացված է դրա մոտ 10-15 տոկոսը: Հանրապետություն կուսակցության նախագահը նշել է, թե չի վիճարկում խորհրդարանում աշխատելու Կոնգրեսի գործընկերների ցանկությունը, բայց ինքը համարում է, որ կարող է բերվող օրենքների մասին կարծիք արտահայտել նաեւ դրսում եւ գերադասում է մնալ հասարակության 90 տոկոս ընդդիմադիր հատվածի հետ փողոցում: Արամ Սարգսյանն ասել է, թե փողոցում պայքարի անհրաժեշտ քայլերը կլին են եւ հանրությունը կտեսնի դրանք:
Հիշեցնենք, որ մայիսի 6-ի ընտրությանը Կոնգրեսը ստացել է, նախնական տվյալով, 7.1 տոկոս քվե: Արամ Սարգսյանը Կոնգրեսի համամասնական ցուցակում երրորդն էր:
Վանաձորի քաղաքապետը ներողություն է խնդրել
Ցինիզմը միշտ կար, պարզապես պոկվել է «պատշաճության» դիմակը
Բայց իմացեք, սոված մարդն ընդունակ է ամեն ինչի»,- նախազգուշացրեց պատգամավորը
Հակակարկտային կայանները անձրեւը կարկուտի՞ են վերածել
