Կառավարությունը դեռևս գումար չի հատկացրել Թռչկանի ջրվեժի տարածքի անձնագրավորման և քարտեզագրման աշխատանքների համար

Բնապահպանության նախարարության մասնագետները դիմել են կառավարություն և սպասում են համապատասխան ֆինանսավորմանը: Ինչպես Lragir.am-ին տեղեկացրեց բնապահպանության նախարարության կենսառեսուրսների կառավարման գործակալության պետ Արտաշես Զիրոյանը, ոչ միայն Թռչկանի ջրվեժի տարածքը, այլ նաև Տավուշի և Լոռու մարզերի բնության բոլոր հուշարձանները պետք է գույքագրվեն, քարտեզագրվեն ու անձնագրավորվեն:

«Դիմել ենք կառավարությանը, գումար ենք պահանջում, որպեսզի այդ աշխատանքներն իրականացվեն: Ինձ թվում է` մենք այս տարի բոլորը կվերջացնենք»,- ասաց Զիրոյանը` հավելելով, որ Թռչկանից ոչ պակաս կարևոր բնության հուշարձաններ կան, որոնք այսօր անձնագրավորված չեն: Առաջին փուլում նախատեսվում է պատմական նշանակություն ունեցող 230 բնության հուշարձանի անձնագրավորման աշխատանք կատարել: Ծրագիրն, ըստ Արտաշես Զիրոյանի, կլինի շարունակական: Նրա հաշվարկներով` 400-500 բնության հուշարձաններ պետք է անձնագրավորվեն Հայաստանում, պետք է նաև այդ հուշարձանների գիտական հիմնավորումը լինի:

Թռչկանի ջրվեժի տարածքում օրերս տեղի ունեցած սողանքի վերաբերյալ հարցին ի պատասխան Զիրոյանն ասաց, որ բնապահպանության նախարարությունը ոչինչ անել չի կարող, դա երկրաբանական խնդիր է:

«Ես էլ թերթերից իմացա, որ սողանք է եղել: Դա կարգավորվող հարց է, ես չեմ տեսնում էդքան լուրջ բան: Դա առաջին դեպքը չէ, Տավուշի և Լոռու մարզերում հսկայական վտանգավոր սողանքային տարածքներ ունենք»,- ասաց նա:

«Պահպանենք Թռչկանի ջրվեժը» նախաձեռնության անդամներն ու բնապահպանները նամակով դիմել են նախարարությանը, որպեսզի մասնակցեն անձնագրավորման աշխատանքներին: Թեև նրանց դեռևս կոնկրետ պատասխան չի տրվել, սակայն Արտաշես Զիրոյանը նշեց, որ մեծ սիրով կընդառաջեն: «Մենք ողջունում ենք, համագործակցությունը շատ լավ բան է: Վերջապես բոլորիս նպատակը մեկն է` պահպանել բնությունը: Տարբերությունն այն է, որ մենք իշխանության մեջ ենք, իսկ մարդիկ հասարակական կազմակերպություն են»,- ասաց նա: