Տարոն Մարգարյանը՝ իր հրաժարականի պահանջի մասին

  • Ներքին կյանք - 16 Մայիսի 2018, 18:57
Երևանի քաղաքապետ Տարոն Մարգարյանը լրագրողների հետ զրույցում նշել է, որ Մյասնիկյանի արձանի հետևում գտնվող այգու բարեկարգման ծրագրի համաձայն՝ մի քանի անգամ ավելի ծառեր են տնկվելու հատված ծառերի փոխարեն: Տարոն Մարգարյանը վստահեցնում է, որ մայրաքաղաքի 2800-ամյակին նվիրված այգու տարածքում բարեկարգումից հետո որևէ սրճարան և ռեստորան չի լինելու. այն պատկանելու է երևանցիներին: Երևանի քաղաքապետարանի դիմաց լրագրողների հետ զրույցում Տարոն Մարգարյանն ընդգծեց, որ այդ այգին երկար տարիների տրված է եղել վարձակալության, որից հետո վարձակալն այն վերադարձրել է Երևանին, իսկ Վարդանյանների ընտանիքը ստանձնել է այգին բարեկարգելու աշխատանքները:

«Բարեկարգման աշխատանքներն արդեն երեք ամիս ընթանում են: Այգին որևէ առևտրային, սրճարանային տարածք չի լինելու, այն լինելու է համայնքինը, իսկ ինչ վերաբերում է ծառերի հատմանը, Վարդանյանների ընտանիքն իր ծրագրում կանաչ տարածքի ավելացում ունի: Եթե իրականում որոշ քանակի ծառեր են կտրվել, համոզված եղեք՝ մի քանի անգամ ավել ծառեր են տնկվելու: Երբ այսօր Վարդանյանների ընտանիքը մամուլով կներկայացնի այդ ծրագիրը, այդ ժամանակ մենք պատրաստ ենք մյուս հարցերին պատասխանել», նշեց Մարգարյանը:

Նա անդրադարձավ նաև մայիսի 16-ին Երևանի քաղաքապետարանի առջև տեղի ունեցած բողոքի ակցիային, որի ընթացքում ակցիայի մասնակիցները ներխուժել են քաղաքապետարանի շենք:

«Ես դատապարտում եմ այդ գործողությունները: Հստակ երևում է, որ օրենքի խախտում է եղել, նրանք ներխուժել են քաղաքապետարանի շենք և փորձել են քաղաքապետարանի բնականոն աշխատանքը խանգարել: Ես կոչ եմ անում մեր իրավապահ մարմիններին, որ զբաղվեն այս հարցով: Մենք որպես տեղական ինքնակառավարման մարմին անկախ ենք և իրականացնում ենք մեր ծրագրերը, նման անօրինականությունները մենք չենք հանդուրժի»,- ասաց Տարոն Մարգարյանը:

Անդրադառնալով իր հրաժարականի պահանջին՝ Տարոն Մարգարյանը նշել է, որ աշխարհում ընդունված չէ, երբ մի քաղաքական ուժ գալիս է իշխանության, փորձի ճնշել ընտրովի տեղական ինքնակառավարման մարմիններին: Նա ասել է, որ հրաժարական չի տալու:

Ամենաընթերցվածը