1in.am-ը նոր խմբագիր ունի. կայքը իր առջև նոր առաջնահերթություններ է սահմանել

  • Ներքին կյանք - 16 Հոկտեմբերի 2016, 12:32
«Առաջին լրատվական» լրատվական-վերլուծական կայքի տարածած հաղորդագրությունից տեղեկանում ենք, որ հաշվի առնելով Հայաստանի առջև ծառացած նոր մարտահրավերները՝ պայմանավորված արտաքին և ներքին մի շարք նոր սպառնալից իրողություններով, ինչպես նաև նկատի ունենալով 2017թ. խորհրդարանական ընտրություններում անկախ լրատվամիջոցների դերն ու կարևոր նշանակությունը և իշխանական բոլոր լրատվական հարթակների ընտրողական մոտեցումը և նրանց կողմից տաբուավորված քաղաքական ուժերին և գործիչներին լիարժեք արտահայտվելու հնարավորություն ընձեռելու անհրաժեշտությունը, լրատվամիջոցը վերադասավորել է իր առաջնահերթությունները։ Ըստ այդմ՝ որոշվել է, որ կայքի նոր գլխավոր խմբագրի պարտականությունները կատարելու է քաղաքագետ Աղասի Ենոքյանը։

Հաղորդագրությունում ասվում է, որ Հայաստանի շուրջ ծավալվող տարածաշրջանային և գլոբալ զարգացումները՝ որպես երկրի առաջատար լրատվամիջոցներից մեկը, www.1in.am-ը նպատակադրվել է թիրախավորված ընդլայնել իր լսարանը։ Ստեղծված արդի ժամանակաշրջանում կայքը իր կարևոր ու նոր խնդիրներից է հռչակել Եվրասիական տնտեսական միության կազմում մեր երկրի քաղաքական և տնտեսական գահավիժումի և ՀԱՊԿ շրջանակում Հայաստանի և Արցախի առջև կանգնած օրախնդիր մարտահրավերների և անվտանգային սպառնալիքների մասին բազմակողմանի բարձրաձայնումը։

Ըստ հաղորդագրության՝ ներկա հանգրվանում լրատվամիջոցը Հայաստանի՝ որպես ինքնիշխան պետության առաջընթացի միակ և հնարավոր երաշխիք տեսնում է ԱՄՆ-ի, Եվրամիության և ՆԱՏՕ-ի հետ Հայաստանի խորացված և բազմակողմ հարաբերությունների հաստատման և ամրապնդման օգտին քարոզչությունը։

Համապետական կարևորագույն ընտրությունների նախօրեին՝ քաղաքական դաշտի ամայությունը լրատվամիջոցի առջև նոր խնդիր է առաջադրել՝ հանդես գալ նաև որպես գաղափարներ առաջադրող և գեներացնող՝ միաժամանակ պայքար մղելով ինքնիշխան, արժանապատիվ առաջադեմ և եվրոպական մոդելի պետության կայացման և զարգացման դեմ թաքնված և անթաքույց հանդես եկող իշխանական և կեղծ ընդդիմադիր ուժերի, օտարերկրյա գործակալների, առանձին գործիչների և հոսանքների դեմ։

Զուգահեռաբար կայքը վճռել է վերազինվել՝ Հայաստանում և սփյուռքի համայնքներում մեծացնելու իր ներկայությունն ու տարածվելու միջոցները։ Մեկ այլ որոշմամբ, լրատվամիջոցի սեփականատեր և նախկին խմբագիր Արման Բաբաջանյանը այսուհետ պատասխանատու կլինի կայքի տեխնիկական վերազինման և արդի միջոցների ներգրավման համար։

Ամենաընթերցվածը