Մանրամասներ Գյումրիի ռուսական 102-րդ ռազմաբազայի զինծառայողի դանակահարության վերաբերյալ. ՀԺ

  • Ներքին կյանք - 14 Հոկտեմբերի 2016, 09:53
Հայկական ժամանակ թերթը գրում է. «Հոկտեմբերի 12-ի լույս 13-ի գիշերը դանակահարության դեպք է տեղի ունեցել Գյումրիում. դանակահարվել է ռուսական 102-րդ ռազմաբազայի պայմանագրային զինծառայող, 1992 թվականին ծնված Ալեքսանդր Ռուցկոյը։

ՀՀ ոստիկանության հասարակայնության հետ կապերի և լրատվության վարչությունից մեր հարցին ի պատասխան ասացին, որ դեպքը տեղի է ունեցել գիշերը՝ ժամը 03:00-ի սահմաններում, իսկ պայմանագրային զինծառայողը «Գյումրի» բժշկական կենտրոն է դիմել ժամը 07:30-ի սահմաններում։ Զինծառայողը բժշկական կենտրոն մեկնած օպերատիվ-քննչական խմբին պատմել է, թե վնասվածքը ստացել է Գյումրու Շիրակացի փողոց-Մարմարաշեն խճուղի խաչմերուկում մի քանի անհայտ անձանց հետ վիճաբանության ընթացքում։ Ռազմաբազան գտնվում դեպքի վայրից ոչ հեռու։

Դանակահարության դեպքի առթիվ ոստիկանությունում նախապատրաստված նյութերն ուղարկվել են ՀՀ քննչական կոմիտե հետագա ընթացքը լուծելու համար։ Ինչ վերաբերում է զինծառայողի առողջական վիճակին, ապա «Գյումրի» բժշկական կենտրոնից մեզ ասացին, որ նա ստացել է աջ թոքակողի կտրած-ծակած վերք։ Ցուցաբերվել է համապատասխան բուժօգնություն, վիրահատվել է, կյանքին վտանգ չի սպառնում։ Թե ովքեր են եղել այդ անհայտ անձինք, և ինչու են ցանկացել վնասել պայմանագրային զինծառայողին, դեռ հայտնի չէ»։

Մանրամասները՝ թերթի այսօրվա համարում

Ամենաընթերցվածը