Տիգրան Ուրիխանյանը հետ կանգնեց իր խոսքից

  • Ներքին կյանք - 12 Հոկտեմբերի 2016, 12:42
ԱԺ ԲՀԿ խմբակցության պատգամավոր Տիգրան Ուրիխանյանի հայտարարությունը մանդատը վայր դնելու հարցի վերաբերյալ

Վստահաբար, մի քանի հազար քաղաքացիների բաց նամակները, խորհրդարանի իմ մի քանի տասնյակ գործընկեր պատգամավորների արձագանքը, ժողովրդի շահի պաշտպանության շարունակության պահանջվածությունն ունեցան չափազանց էական ազդեցություն պատգամավորական մանդատս վայր դնելու որոշման վրա:

Խորհրդակցությունների շարք եմ ունեցել խորհրդարանական գրեթե բոլոր ուժերի ղեկավարների ու ներկայացուցիչների հետ և չափազանց բարձր եմ գնահատում հարգարժան գործընկերներիս կամեցողությունն ու զորակցությունը: Ըստ էության ցանկանում եմ նշել, որ իմ ու թիմակիցներիս  նկատմամբ քաղաքական պայքարի նորմերից դուրս  արված հակառակորդների հարվածները իրենց նպատակակետին չհասան: «Գոտկատեղից ներքև», անձնական վիրավորանքներով և մեր ազգին անհարիր  կերպով ընտանիքներին ու հարազատներին վիրավորող մեթոդներով գործողները նենգ ու թույլ մարդիկ են, իսկ նրանց օգտագործողները ուղղակի թույլերի թիկունքում թաքնվողներ: Վերջին շրջանում իմ նկատմամբ  կիրառվող այդ բոլոր մեթոդների հեղինակները թող իմանան, որ ժողովրդանպաստ ելույթները, օրենսդրական նախաձեռնությունները, քվեարկություններն ու ամենօրյա աշխատանքը  խորհրդարանում շարունակելու եմ:

Իսկ հաջորդիվ նպատակահարմար եմ գտնում մեծ ու  ժողովրդականություն վայելող այնպիսի մի  քաղաքական թիմի հետ միավորումը, որում լուրջ պոտենցիալի առկայությունը շրջադարձ կբերի  հայաստանյան իրականության մեջ:

Խմբ. կողմից. Հիշեցնենք, որ ԲՀԿ խմբակցության ղեկավար Նաիրա Զոհրաբյանը կասկածել էր, որ Տիգրան Ուրիխանյանը կպահի մանդատը վայր դնելու իր հայտարարությունը: