ՀՀ վարչապետ Կարեն Կարապետյանին շնորհավորական ուղերձներ են հղել Չինաստանի Պետական խորհրդի, Բելառուսի և Վրաստանի վարչապետները

  • Ներքին կյանք - 20 Սեպտեմբերի 2016, 17:19
Չինաստանի Ժողովրդական Հանրապետության Պետական խորհրդի վարչապետը, Բելառուսի Հանրապետության և Վրաստանի վարչապետները շնորհավորական ուղերձներ են հղել Կարեն Կարապետյանին՝ Հայաստանի Հանրապետության վարչապետի պաշտոնում նշանակվելու կապակցությամբ:

Չինաստանի Ժողովրդական Հանրապետության Պետական խորհրդի վարչապետ Լի Կեցյանի շնորհավորական ուղերձում նշված է.

«Ձերդ Գերազանցություն,

ՉԺՀ կառավարության ու ժողովրդի և անձամբ իմ անունից անկեղծորեն շնորհավորում եմ Ձեզ՝ Հայաստանի Հանրապետության վարչապետի պաշտոնում նշանակվելու կապակցությամբ:

Վերջին տարիներին նկատվում է հայ-չինական բարեկամական հարաբերությունների և համագործակցության դրական զարգացման միտում: Կողմերի միջև իրականացվում են բարձր մակարդակի սերտ շփումներ, անշեղորեն բարձրանում է քաղաքական փոխվստահության մակարդակը, և ընդլայնվում է գործնական համագործակցությունը տարբեր ոլորտներում: Դա մեզ մոտ գոհունակության զգացում է առաջացնում:

Մեծապես կարևորում եմ հայ-չինական հարաբերությունների զարգացումը և պատրաստ եմ սերտորեն համագործակցել Ձեզ հետ՝ հետագայում ևս հայ-չինական բարեկամական համագործակցությունն առաջ մղելու համար՝ ի նպաստ մեր երկու երկրների և ժողովուրդների:

Մաղթում եմ Ձեզ քաջառողջություն և հետագա հաջողություններ, բարեկամ Հայաստանին՝ բարգավաճում, իսկ նրա ժողովրդին՝ երջանկություն և բարեկեցություն»:

***

Բելառուսի Հանրապետության վարչապետ Անդրեյ Կոբյակովի շնորհավորական ուղերձում ասված է.

«Հարգելի Կարեն Վիլհելմի,

Բելառուսի Հանրապետության կառավարության և անձամբ իմ անունից սրտանց շնորհավորում եմ Ձեզ՝ Հայաստանի Հանրապետության վարչապետի պաշտոնում նշանակվելու կապակցությամբ:

Վստահ եմ, որ Ձեր գիտելիքները, հարուստ փորձը և բարձր պրոֆեսիոնալիզմը կնպաստեն բարեկամ Հայաստանի զարգացմանն ու բարգավաճմանը, մեր երկրների միջև փոխշահավետ համագործակցության ընդլայնմանը՝ փոխգործակցության բոլոր ոլորտներում:

Անկեղծորեն մաղթում եմ Ձեզ, հարգելի Կարեն Վիլհելմի, քաջառողջություն, երջանկություն, հաջողություններ պատասխանատու պետական պաշտոնում, ինչպես նաև բոլոր նախանշված ծրագրերի իրականացում և ստեղծարար նախաձեռնությունների իրագործում»:

***

Վրաստանի վարչապետ Գիորգի Կվիրիկաշվիլիի շնորհավորական ուղերձում նշված է.

«Ձերդ գերազանցություն,

Վրաստանի կառավարության և անձամբ իմ անունից թույլ տվեք սրտանց շնորհավորել Ձեզ՝ Հայաստանի վարչապետի պաշտոնում նշանակվելու կապակցությամբ և հաջողություն մաղթել պետական գործունեության մեջ:

Համոզված եմ, որ մեր համագործակցությունն ու համատեղ ջանքերը Վրաստանի և Հայաստանի միջև առկա սերտ կապերի և ավանդական բարիդրացիական հարաբերությունների հետագա խորացման հիմք կդառնան:

Ցանկանում եմ կրկին հավաստել խորին հարգանքս և մաղթել Ձեզ արդյունավետ գործունեություն վարչապետի պաշտոնում»: