Փոխըմբռնման հուշագիր՝ Հայաստանի ազգային ագրարային և Փենսիլվանիայի նահանգային համալսարանների միջև

  • Ներքին կյանք - 20 Սեպտեմբերի 2016, 15:01
2017թ. հունվարից Հայաստանի ազգային ագրարային համալսարանում կդասավանդվի «Պարենային անվտանգության համակարգերի կառավարում» առարկան

Փենսիլվանիայի նահանգային համալսարան (ՓենՍտեյթ) այցի ընթացքում Հայաստանի ազգային ագրարային համալսարանի ռեկտոր, ՀՀ ԳԱԱ ակադեմիկոս Արշալույս Թարվերդյանը և Ագրոբիզնեսի հետազոտությունների և կրթության միջազգային կենտրոն (ICARE) հիմնադրամի տնօրեն, դոցենտ, Տեխասի Էյ ընդ Էմ համալսարանի ասոշիեյթ պրոֆեսոր Վարդան Ուռուտյանը համալսարանի և հիմնադրամի անունից փոխըմբռնման հուշագիր ստորագրեցին ՓենՍտեյթի գյուղատնտեսության քոլեջի դեկան, դոկտոր Ռիչարդ Ռուշի հետ: Հուշագիրը նախատեսում է գործակցության լայն շրջանակ՝ ուսումնական պլանների մշակումից և բարեփոխումներից մինչև ուսանողների և դասախոսների փոխանակում և համատեղ հետազոտական ծրագրերի իրականացում, որոնք փոխադարձ հետաքրքրություն են ներկայացնում և նպաստելու են երկու համալսարանների հետագա զարգացմանը: Մասնավորապես, ՓենՍտեյթը, ՀԱԱՀ-ն և ICARE-ը համաձայնության եկան 2017թ. հունվարին ՀԱԱՀ-ում մեկնարկել Պարենային անվտանգության համակարգերի կառավարման հավաստագրային ծրագիրը: Մասնագիտությունը կդասավանդվի ԱՈՒԿ-ում: Սա ևս մեկ կարևոր քայլ կլինի ՀԱԱՀ ուսումնական պլանի միջազգայնացման գործում և, անշուշտ՝ ՀՀ բարձրագույն կրթության համակարգում աննախադեպ հնարավորություն՝ գտնելու Հայաստանում սննդի անվտանգությանը վերաբերող մի շարք կարևորագույն հարցերի լուծումը:

ՓենՍտեյթը ԱՄՆ համալսարանների այն կոնսորցիումի անդամ համալսարաններից մեկն է, որը գործակցում է ՀԱԱՀ-ի և ICARE-ի հետ՝ ԱՄՆ ՄԶԳ-ից ֆինանսավորվող Իննովեյթ-Հայաստան ծրագրի շրջանակում: Այս հուշագրի ստորագրմանը նախորդել են կոնսորցիումը ղեկավարող Վիրջինիա Թեք համալսարանի սննդագիտության և տեխնոլոգիաների դեպարտամենտի ղեկավար Ջո Մարսիի և Փենսիլվանիայի նահանգային համալսարանի սննդագիտության պրոֆեսոր Քեթի Քաթերի կողմից ապագա ծրագրի ուսումնական պլանի կազմման աշխատանքները:

Պարենային անվտանգության համակարգերի կառավարում ծրագիրը ևս մեկ բացառիկ միջազգային ծրագիր է, որը, Ագրոբիզնեսի ուսուցման կենտրոնի, Ի-Վի-Էն գինու ակադեմիայի և Ագրարմենեջմենթի (որին վերջերս տրվեց միջազգային հավատարմագրում) հետ միասին, Հայաստանի ազգային ագրարային համալսարանը դարձնում է հայաստանյան առաջատար բուհը՝ միջազգային կրթական ծրագրերի որակի և քանակի տեսակետից:

Պրոֆեսոր Թարվերդյանի և դոկտոր Ուռուտյանի այցը շարունակվում է: Վաղը՝ սեպտեմբերի 21-ին նրանք Փենսիլվանիայից կմեկնեն Վիրջինիա, որտեղ հանդիպումների շարք կունենան Վիրջինիա Թեք համալսարանի նախագահ Թիմըթի Սենդսի և առանցքային այլ գործիչների հետ, մասնավորապես՝ այդ համալսարանի Դասախոսների զարգացման և կրթական հետազոտությունների կենտրոնում և Միջազգային հետազոտությունների, կրթության և զարգացման գրասենյակում: