Ինչպես հայտնի է, Հայ ազգային կոնգրեսը հայտարարել է, որ Հայաստանի խորհրդարանի 2012 թվականի մայիսի 6-ի ընտրության արդյունքը բողոքարկելու է ընդհուպ Եվրոպական դատարան: Հայաստանի Սահմանադրական դատարանը չբավարարեց ընտրությունը բողոքարկելու ՀԱԿ դիմումը: Այդպիսով, Հայ ազգային կոնգրեսը արդեն կարող է դիմել Եվրոպական դատարան, եւ թերեւս հենց այդպես էլ կվարվի, ինչպես ասել է Սահմանադրական դատարանում հայցի ընթացքում Կոնգրեսի ներկայացուցիչ, փաստաբան Վահե Գրիգորյանը:
Ինչ կտա Մարդու իրավունքի եվրոպական դատարանը Կոնգրեսին:
Հայաստանի խորհրդարանի ընտրության հարցի քննարկումը ՄԻԵԴ-ում, թերեւս մի փոքր հնչեղություն կապահովի, այն առումով, որ հարցը քննարկվում է Եվրոպայում, ինչը Կոնգրեսի առաջնորդներին հնարավորություն կտա հանրահավաքի հարթակից կամ ասենք խորհրդարանի ամբիոնից հայտարարել, որ իրենք կարողացել են ընտրակեղծիքի հարցը միջազգայնացնել եւ դարձնել լուրջ միջազգային քննարկման առարկա:
Դա կարող է լինել Կոնգրեսի բարոյական հաղթանակը, բայց անշուշտ պարզ է, որ ՄԻԵԴ-ը չի վերանայելու Հայաստանի խորհրդարանի ընտրության պաշտոնական արդյունքը, իսկ Եվրոպան էլ ՄԻԵԴ որեւէ որոշում ի գիտություն է ընդունելու միայն դրա քաղաքական անհրաժեշտության դեպքում, թեեւ պարզ է, որ այդ անհրաժեշտության պարագայում Եվրոպան Հայաստանի իշխանության վրա ճնշում բանեցնելու բազմաթիվ այլ լծակներ ունի:
Մարդու Իրավունքի Եվրոպական դատարանի միակ առարկայական արդյունքը կարող է լինել այն, որ դատարանը իշխանությանը պարտադրի Կոնգրեսին փոխհատուցում տալ ինչ-ինչ իրավունքների խախտման համար, որ տեղի են ունեցել Հայաստանի դատական ատյաններում ընտրությունը բողոքարկելու գործընթացի, կամ դրա փորձերի ընթացքում: Օրինակ, ՄԻԵԴ-ը կարող է փաստել, որ Հայաստանի դատական համակարգը չի տալիս ընտրական գործընթացը դյուրին կերպով բողոքարկելու հնարավորություն, ինչը սահմանափակում է մարդու իրավունքը: Օրինակ, Հայ ազգային կոնգրեսի առաջնորդ Լեւոն Տեր-Պետրոսյանը այդ խնդրի մասին բարձրաձայնում էր դեռեւս մայիսի 6-ին Միասնական շտաբում տեղի ունեցած ասուլիսի ընթացքում:
Եվրոպական դատարանը, օրինակ, կարող է մատնանշել այդ թերությունը, նաեւ հայտարարել, որ Հայաստանի իշխանությունը պետք է քայլեր անի դատաիրավական համակարգը բարեփոխելու ուղղությամբ, իսկ քանի դեռ այդ քայլերը չկան, իշխանությունը պետք է փոխհատուցի տվյալ դեպքում Կոնգրեսի իրավունքների սահմանափակումը:
Այդպիսով, միգուցե իշխանությանը պարտադրեն որոշակի քանակությամբ ֆինանսական փոխհատուցում տրամադրել Կոնգրեսին, նրա հանդեպ իրավացի չլինելու համար: Դա Կոնգրեսի բարոյական հաղթանակի տեսլականը մի քիչ էլ կֆինանսականացնի, ինչը թերեւս կարող է լինել ընդդիմության առարկայական օգուտը ՄԻԵԴ դիմելուց:
Իսկ այդ փողը Կոնգրեսը կարող է օգտագործել խորհրդարանի հաջորդ ընտրությանը, հատկապես որ մայիսի 6-ը ցույց տվեց, թե որքան մեծ նշանակություն ունի փողը այդ ընտրության ժամանակ:
Մեկնաբանություն