Դեկտեմբերի 26-ին Ժառանգություն կուսակցության երիտասարդները, մի շարք Հ/Կ-ների ներկայացուցիչներ և ԱԺ Ժառանգություն խմբակցության պատգամավոր Զարուհի Փոստանջյանը, ըստ նախօրոք հայտարարված ծրագրի, մեկնեցին Թալին, Ապարան եւ Աշտարակ քաղաքներ: Նշված քաղաքներում անցկացվեցին նախօրոք հայտարարված բողոքի գործողությունները` ընդդեմ ՀՀ-ում տիրող բռնապետական ռեժիմի, հայ-թուրքական արձանագրությունների և ՙմադրիդյան սկզբունքների՚:
 
Հայրենասիրական երգերով ու բարձրագոչ վանկարկումներով, ինչպես նաև` տարբեր բովանդակությամբ պաստառների ցուցադրությամբ ուղեկցվող մեր ակցիա-քայլերթին ակներև հետաքրքրությամբ հետևում էին, ապա միանում ու իրենց համաձայնությունն էին հայտնում հարյուրավոր մեր հայրենակիցները: Մենք բողոքի գործողություններն ամբողջովին իրականացրինք, ինչի շնորհիվ այս անգամ արդեն Թալին, Ապարան եւ Աշտարակ քաղաքների մեր հայրենակիցներին  ահազանգեցինք այն վտանգավոր զարգացումների մասին, որոնք սպառնում են Հայաստանին ու հայ ժողովրդին` հայ-թուրքական արձանագրությունները վավերացնելու և ՙմադրիդյան սկզբունքները՚ ընդունելու դեպքում, որից, սակայն, կշահեն վաշխառուական հոգեբանությամբ  իշխանական խմբակները, որոնք հսկայական անջրպետ են առաջացրել իրենց ու ողջ հայության միջև` այդ կերպ օժանդակելով ու սպասարկելով միջազգային ուժերի շահերը, ինչի արգասիքն են հակահայ ՙարձանագրություններն ու սկզբունքները՚: Ապարան քաղաքում մեզ մոտեցան տեղի ոստիկանության աշխատակիցները, որոնք ամեն կերպ փորձում էին խոչընդոտել մեր խաղաղ գործողությունը և, հասկանալով, որ մենք գործում ենք մեր իրավունքների սահմաններում, այլ բան չգտան ասելու, քան այն, որ Ապարանի գլխավոր մայրուղին միջազգային նշանակության է և բողոքի գործողություններն արգելվում են:
 
Ցավոք սրտի, ՀՀ հեռուստաընկերություններն այս անգամ ևս, չնայած պատշաճ կերպով ծանուցմանը, տեղեկացված լինելու անօտարելի իրավունք ունեցող ՀՀ քաղաքացիների համար դարձյալ չլուսաբանեցին մեր բողոքի գործողությունները, այսպիսով, փաստորեն, մեկ անգամ ևս վերահաստատելով, որ եթերից համակողմանի անաչառ լրատվություն հաղորդելն ու ազատ խոսքի իրենց պատկերացումներն ամբողջությամբ համընկնում են Բաղրամյան 26-ում հանգրվանած անձանց պատկերացումների հետ:
 
Հատուկ ուզում ենք հավելել, որ, բողոքի գործողությունների ավարտից հետո, ներշնչված լինելով մեր հայրենակիցների ջերմ համակրանքից ու ազգադավ ծրագրերին դիմադարձելու նրանց վճռականությունից, ՀՀ բոլոր մարզերում ու քաղաքներում հետագայում ևս շարունակելու ենք մեր բողոքի գործողությունները` ընդդեմ Հայաստանի Հանրապետությունում տիրող բռնապետական ռեժիմի, հայ-թուրքական արձանագրությունների և ՙմադրիդյան սկզբունքների՚:
 
Հրայր Սավզյան - Թեղուտի պաշտպանության խմբի անդամ, Զարուհի Փոստանջյան - Թեղուտի պաշտպանության խմբի անդամ, Աժ պատգամավոր, Ժառանգություն խմբակցություն, Սեդա Մելիքյան - Փաստաբաններ մարդու իրավունքների համար ՀԿ, Դանիել Իոաննիսյան - Քաղաքացիական ազգային նախաձեռնություն ՀԿ, և Ժառանգություն կուսակցության երիտասարդներ

12:02:51 - 29/12/2009
Ուղարկել էլ.փոստով	Տպագրելու տարբերակը